O`zbekistonda xizmat ko`rsatgan artist Lola Ahmedovani chuv tushirish uchun unga qo`ng`iroq qilib, intervyuga taklif qildik va “Muloqot.uz” kafesida uchrashishga kelishib oldik. Hech gapdan xabari yo`q Lola Ahmedova savollarimizga jiddiy javob bera boshladi.
- Lola opa, siz ilgariga qaraganda ancha qat`iyatli ayolga aylangansiz... Sizdagi bu o`zgarishning sababi nima?
- Turmush qurganingizdan so`ng hayotga jiddiy qarashni boshlar ekan kishi. Balki elkamga oila va san`at ma`suliyati birvarakayiga yuklangani uchundir yoki yaqinlarimga, farzandimga alohida e`tibor va mehr berishim kerakligini his qilganim uchundir. Mashhur bo`lsangizu, oilangizga to`kis e`tibor-mehr bera olmasangiz ham bo`lmaydi...
Kutilmaganda yonimizdagi stolda o`tirgan yigit yonimizga kelib gapga aralashdi: — Kechirasiz, men ham bitta savol bersam bo`ladimi?
Kamina: — Tushunmadim... Iltimos, bizga xalaqit bermang
Lola Ahmedova: (hayron bo`lib) — Biroz keyinroq, suhbatimiz oxirida, maylimi?
Yigit: — Suhbat oxirigacha vaqtim yo`q, ketishim kerak. Meni bir daqiqa eshiting...
Lola Ahmedova yigitga yuzlanib: — Mayli, bir eshitib ko`raylik.
Yigit: — Ikki yil oldin ne-ne orzu-umidlar bilan sizni to`yimga chaqirish uchun qo`ng`iroq qilganman. Shunda men aytgan narxga ko`nmay, to`yga kelmagansiz. Mashhur san`atkorlarni to`yiga chaqirishga hammaning ham imkoniyati etavermasligini bilmaysiz-da. (Lola Ahmedova yigitni diqqat bilan tinglasada, asabiylasha boshladi) Kechirasizu, lekin hozirigi san`atkorlarda insof degan narsa qolmayapti, shu gaplarimni gazetangizda yozing!
Lola Ahmedova o`zini xotirjam tutishga urinib: — Shoshmang, men sizni tushundim. Hozir intervyuni tugatib olaylik, keyin nima dardingiz bo`lsa aytasiz, bo`ladimi?
Yigit (qizishib): — Yozmaganingizga qo`ymayman! Bekorchi gaplarni yozgandan ko`ra, haqiqatni yozmaysizmi? Xalq bilsin shunaqa gaplarni...
Lola Ahmedova: — O-o-o, balki sudga ham berarsiz? (zaxarxanda kuladi)
Kamina: — Bo`ldi yozamiz, dedim-ku? Endi bizni tinch qo`ying.
Yigit: — Qaysi sonda yozasiz, men bilishim kerak.
Kamina: — Lola opa, shu gaplar rostmi? Uni taniysizmi?
Lola Ahmedova: — Yo`g`-ey, tanimayman! Endi har xil odam bor-da. Keling, suhbatni davom ettiraylik. Sizga yozamiz, dedik-ku, yoki tilxat yozib beraylikmi?
Suhbatga xalaqit bermaylik deb kafening boshqa tomonida o`tirgan Lola Ahmedovaning onasi va prodyuseri Dilbar Ahmedova shovqinni eshitib, yugurib keldi
Dilbar Ahmedova: — Ha, tinchlikmi?
Yigit: — Tinchlik, tinchlik, bo`lgan voqeani aytib beryapman, jurnalistga.
Dilbar Ahmedova: — Xalaqit bermang! Kimsiz o`zi? Nima “problema”? (jahli chiqa boshladi).
Lola Ahmedova: — “Problema” — biz to`yga bormapmiz!
Yigit: — Xotinim Lolaning ashaddiy muxlisasi edi. To`yga Lola keladi deb qo`ygandim unga. Sal qolgan, to`yim buzilishiga (qizishib qattiq-qattiq gapira boshlaydi).
Dilbar Ahmedova: — Shoshmang, sog`liginigiz joyidami o`zi? (Kaminaga yuzlanib) — Bu odamni sizlar chaqirmaganmisizlar ishqilib?
Kamina: — Yo`g`-e... Uni birinchi marotaba ko`rib turibman.
Boshqa stolda o`tirgan xo`randa yigitlardan birining janjaldan jahli chiqib gapga aralashgandi ikki o`rtada janjal boshlanib ketdi.
Lola Ahmedova ularning janjalini hayron bo`lgancha kuzatib: — Voy tovba!..
Yigit: — San`atkorman deb endi odamlarni mensimaslik kerakmi? Bu nimasi?
Kamina: — Kimdir bu odamni olib chiqsin, iltimos...
Dilbar Ahmedova: — E, bu kasal shekilli... (fotomuxbirga yuzlanib) Siz nega rasmga olyapsiz? Sizning odamingizmi yoki?
Fotomuxbir: — Yo`g`-ey, biz jurnalistmiz, voqea joyidan fakt uchun olib qo`ydim xolos...
Lola Ahmedova: — Manavini o`chirib turaylik (diktofonga ishora qilib), yuring, ketdik intervyuni boshqa joyda qilarmiz...
Janjallashgan yigitlar bir-birini sudrab pastki qavatga tushib ketishdi.. Ularning vajohatidan, Lolaning rangi oqardi, o`zini yomon his qila boshlaganini ko`rib, hazilni shu joyda to`xtaishga qaror qildik.
Kamina: — To`xtanglar! Bu shunchaki bayram hazili edi. Siz “Chuv tushdi”ngiz, Lola opa!
Lola bilan onasi avvaliga hayratdan qotib qolishdi, keyin esa xayriyat-ey, deb kulib yuborishdi.
Fikrlar:
Lola Ahmedova:
— Avvaliga hayron bo`ldim, keyin qo`rqib ketdim. Tavba, shunaqa ham hazil qilasizlarmi? (kuladi).
Lolaning onasi:
— Sal qoldi u bolani urib yuborishimga. Yaxshiyamki, bu hazil dedingiz bo`lmasa... (kuladi).
Shunday qilib, bayram arafasida jiddiy, kamgap Lola Ahmedovani chuv tushirishga va kuldirishga muvaffaq bo`ldik.
Mohichehra EShMIRZAEVA tayyorladi
