Shanba kuni Afg`onistonda prezidentlik saylovlari boshlandi. Ovoz berish 28 mingdan ziyod saylov uchastkalarida o`tkaziladi. Bu haqda day.az nashri xabar bermoqda.
Afg`oniston fuqarolari mamlakatning ko`p yillik prezidenti Hamid Karzayning davomchisini tanlashlari lozim. Hamid Karzay 2001 yil tolibonlarning hukumatdan ag`darilganidan buyon mamlakatga rahbarlik qilib kelmoqda. Ammo, u uchinchi muddatga saylana olmaydi.
Davlatning yangi rahbarini juda qiyin masalalar kutmoqda. Masalan, yangi saylangan prezident xalqaro ittifoq harbiylarini mamlakatdan chiqib ketishi hamda mamlakat xavfsizligini ta`minlashi kerak bo`ladi.
Saylovda uch nafar nomzod g`alabaga da`vogarlik qilmoqda. Ular - sobiq ichki ishlar vaziri Rasul Zalmay, sobiq moliya vaziri Ashraf G`ani Ahmadzay va sobiq tashqi ishlar vaziri Abdulla Abdulla. Shanba kundagi saylovlarda nomzodlardan biri 50 foizdan ortiq ovoz to`play olmasa, 28 may kuni saylovning ikkinchi bosqichi o`tkaziladi.
