Avval xabar qilganimizdek, Shavkat Mirziyoev Ixtiyor Abdullaevni MXXga rahbar qilib tayinladi.
Ixtiyor Abdullaev 1966 yilning 22 may kuni Farg`ona viloyati Uchko`prik tumanida, ziyoli oilada tavallud topgan.
1985 yildan to 1990 yilga qadar Permdagi Huqushunoslik universitetida tahsil olgan.
Ixtiyor Abdullaev mehnat faoliyatini sud ijrochisi lavozimida boshlagan.
U 1988-1990 yillarda Farg`ona shaharda sud ijrochisi lavozimida ishlagan.
1990-1993-yillarda esa Farg`ona viloyati adliya boshqarmasida ishlagan.
1993-1995-yillarda jinoyat ishlari bo`yicha Farg`ona shahar sudi sudyasi, raisi vazifasini bajaruvchi, so`ngra, esa Jinoyat ishlari bo`yicha Farg`ona viloyat sudi sudyasi hamda Sudlov hay`ati raisi lavozimida faoliyat olib borgan.
Ixtiyor Abdullaev 1997 yildan boshlab uch yil davomida O`zbekiston Respublikasi Prezidenti devonida va keyinchalik, bir yil muddatga Jinoyat ishlari bo`yicha Andijon viloyat sudi raisi etib tayinlangan.
Ixtiyor Abdullaev faoliyati davomida Prezidentning Davlat maslahatchisi o`rinbosari, Adliya vazirining birinchi o`rinbosari lavozimlarida ham faoliyat yuritgan.
MXXning yangi rahbari O`zbekiston Prezidenti huzuridagi Amaldagi qonun hujjatlari monitoringi instituti direktori lavozimida esa uch yil muddat, ya`ni 2009 yilgacha ishlagan.
Keyin yana Prezident devoniga Davlat maslahatchisi bo`lib qaytarilgan Ixtiyor Abdullaev, 2015 yil O`zbekiston Respublikasi Bosh prokurori lavozimiga tayinlangan.
Ixtiyor Abdullaev uchun yangi sinov davri boshlandi, sababi u 31 yanvar kuni, bugun Shavkat Mirziyoev tomonidan MXX raisi lavozimiga tayinlandi.
Ikkinchi darajali davlat adliya maslahatchisi bo`lgan Ixtiyor Abdullaev bu sohada ham o`z salohiyatini namoyish qila olishi aniq, sababi bir necha yillar davomida huquq tartibot idoralarida turli lavozimlarda faoliyat yuritgan MXX raisi, bu borada o`ziga xos tajriba orttira olgan.
Yana shuni qo`shimcha qilish kerakki, Ixtiyor Abdullaev O`zbekiston kurash federasiyasi prezidenti ham hisoblanadi.
