Davlat organlari va yirik xo`jalik birlashmalarining rasmiy saytidagi virtual qabulxonalar yopilmoqda. Vazirlik va idoralar rahbariyatiga endi Prezidentning Virtual qabulxonasi orqali murojaat etish mumkin, deb yozadi Norma.uz.
Davlat bojxona qo`mitasi raisning virtual qabulxonasi 2018 yilning 24 fevralidan yopilishi haqida xabar beradi.
«Intellektual mulk agentligi bosh direktorining virtual qabulxonasi» tizimining faoliyati to`xtatilishi to`g`risidagi ma`lumot Agentlikning rasmiy saytida e`lon qilindi.
25 fevraldan boshlab «O`zbekneftgaz» AJ boshqaruvi raisining virtual qabulxonasi o`z ishini to`xtatadi. Bu haqdagi e`lon kompaniyaning rasmiy saytida joylashtirilgan.
Xuddi shu mazmundagi ma`lumotlar boshqa vazirlik va idoralarning rasmiy saytlarida shu kunlarda paydo bo`ladi.
Endi vazirlik va idoraning rahbariyatiga Respublika Prezidentining Virtual qabulxonasining «Vazirliklar va idoralarga murojaatlarni yuborish va qabul kunlari» bo`limi orqali murojaat etish mumkin.
Davlat organlari va idoralarning rasmiy saytlarida virtual qabulxonalarning yopilishi Internet-resurslarning funksiyalari takrorlanishini oldini olish va fuqarolar uchun qo`shimcha qulayliklar yaratish imkonini beradi.
