Ichki ishlar organlari xodimlariga pensiya va nafaqa tayinlash hamda to`lash tartibi to`g`risidagi yo`riqnoma Adliya vazirligida davlat ro`yxatidan o`tkazildi, deb xabar qiladi vazirlikning "Huquqiy axborot" kanali.
Yo`riqnomaga asosan ichki ishlar organlari xodimlari yoki ularning oila a`zolariga pensiyaning quyidagi turlari tayinlanadi:
- xizmat muddatini o`taganligi bo`yicha pensiyasi (uni olish huquqi mavjud bo`lganda);
- nogironlik pensiyasi;
- boquvchisini yo`qotganlik pensiyasi.
Bundan tashqari ichki ishlar organlari xodimlari yoki ularning oila a`zolariga bir marta to`lanadigan:
- xizmatdan pensiyaga chiqish munosabati bilan bo`shatilayotgan xodimlarga to`lanadigan nafaqa;
- ichki ishlar organi pensioneri vafot etganligi munosabati bilan dafn etish marosimi uchun uning oila a`zolariga tayinlanadigan nafaqa ham tayinlanadi.
Xizmatdan pensiyaga chiqish munosabati bilan bo`shatilgan xodimga pensiya tayinlash uchun zarur bo`lgan hujjatlar ichki ishlar organlarining kadrlar (bosh) boshqarmalari tomonidan qabul qilinadi.
