Singapur poytaxti Singapur shahri dunyodagi “Eng aqlli shaharlar” reytingida etakchi deb topildi.
Bunday xulosaga “Juniper Research” konsalting kompaniyasi “Intel” korporasiyasi bilan hamkorlikda olib borgan tadqiqot natijasida kelindi.
Reytingni belgilashda internet-texnologiyalari rivoji va ularni ijtimoiy hayotning asosiy sohalariga kirib kelishi darajasi inobatga olindi.
Mualliflar shahar xo`jaligi, tibbiy xizmatlar ko`rsatish, jamoatchilik xavfsizligini ta`minlash, shuningdek, ishlab chiqarish jabhalariga IT-texnologiyalar integrasiyasini o`rganib chiqishdi.
Xususan, Singapurda transport oqimini boshqarishning kompyuterlashtirilgan tizimi haydovchilarga bir yilda 60 soatni tejash imkonini beradi.
Ushbu shahar tibbiyot sohasida texnologiyalarni qo`llashda ham etakchi deb topildi.
Ayni chog`da Singapur keksa kishilarni ularning salomatligini nazorat qilish, ularga tez tibbiy yordam ko`rsatish zarurligi haqida ogohlantirish imkoniyatini beruvchi mobil ilovalar bilan ta`minlash borasida salmoqli muvaffaqiyatlarga erishayapti.
Ushbu ro`yxatda keyingi o`rinlardan Buyuk Britaniyaning London, undan so`ng esa AQShning Nyu-York, San-Fransisko, Chikago shaharlari joy oldi. Janubiy Koreyaning Seul va Yaponiyaning Tokio shaharlari ham kuchli o`nlikkka kiritilgan.