Bugun Respublika shoshilinch tibbiy yordam ilmiy markazida Turkiyaning Bashkent tibbiyot universiteti bilan hamkorlikda yangiyullik 14 yoshli bemor Umidjon Abdumadjidovga 35 yoshli otasi Ilgor Abduqayumov donorligida buyrak ko`chirib o`tkazish operasiyasi bajarildi. Bu haqda Sog`liqni saqlash vazirligining axborot xizmati xabar berdi.
— Transplantasiya jarrohligi zamonaviy tibbiyotning istiqbolli yo`nalishlaridan biri. Bunday yuqori texnologik operasiyalar AQSh, Rossiya, Germaniya, Norvegiya, Shveysariya, Turkiya kabi tibbiyoti rivojlangan davlatlardagina bajarilardi, xolos, — deydi Sog`liqni saqlash vaziri o`rinbosari, Respublika shoshilinch tibbiy yordam ilmiy markazi bosh direktori Abduhakim Xadjibaev. — Mana, bugun yurtimiz tibbiyoti ham ana shu ilg`or mamlakatlar qatoridan joy oldi. Markazimizda birinchi marta buyrak ko`chirib o`tkazish amaliyotini bajardik. Bu operasiya o`ta murakkab va noyob usul hisoblanadi. Shu bois markazda katta tayyorgarlik ko`rildi. Xorij tajribasini o`rgandik. Shundan so`ng, Turkiyaning Bashkent tibbiyot universiteti bilan hamkorlikda markazimiz tarixida ilk bor buyrak transplantasiyasi bajarildi. Amaliyot Bashkent tibbiyot universiteti rektori, Jahon trnasplantologlari jamiyati prezidenti Mexmet Xaberal bilan hamkorlikda o`tkazildi. Operasiya jarayonida turkiyalik va o`zbekistonlik mutaxassislar o`z mahoratlarini ko`rsatishdi.
Ma`lumot uchun, Mexmet Xaberal Turkiya va Evropaning bir qator davlatlarida transplantologiya yo`nalishiga asos solgan professordir. M. Xaberal buyrak ko`chirib o`tkazish bo`ycha 1832 ta, jigar ko`chirib o`tkazish bo`yicha 344 ta operasiyaga bevosita rahbarlik qilgan. Bashkent tibbiyot universitetida jigar va buyrak transplantasiyasidan tashqari, suyak ko`migi, yurak transplantasiyasi ham o`tkazib kelinmoqda.
— Yana bir murakkab amaliyotni muvaffaqiyatli yakunladik, — deydi professor Mexmet Xaberal. — O`zbekistondagi Respublika shoshilinch tibbiy yordam ilmiy markazida buyrak tarnsplantasiyasini bajarishga har tomonlama puxta tayyorgarlik ko`rilgan ekan. Guvohi bo`ldikki, mutaxassislar malakasi, texnik imkoniyatlar va markaz sharoitlari yuqori darajada. Bemor U.Abdumajidov surunkali buyrak etishmovchiligining terminal bosqichida edi. Buyrak o`z ishini to`liq bajara olmayotgani bois, qoni gamodializ apparati orqali tozalanib kelgan. Amaliyot yaxshi o`tdi, deyolaman. Hozirgacha bo`lgan natijalarning barchasi ijobiy. Tez kunlarda bemor va donor sog`lom hayotga qaytadi. Eng muhimi, endi markaz mutaxassislari bu kabi operasiyalarni bemalol bajara oladi.
Ta`kidlab o`tish lozim, Prezidentimiz Shavkat Mirziyoev ushbu soha rivojiga davlat darajasida e`tibor qaratib kelayotgani ham uning naqadar muhimligini isbotlaydi. Hozirda taransplantasiya amaliyotlarini o`tkazish uchun yurtimiz klinikalarida etarli tajriba va texnik imkoniyatlar mavjud.
Ushbu sa`y-harakatlarning barchasi, avvalo inson manfaatlari va uning hayotiy ehtiyojlarini qondirishga qaratilgan. Mamlakatimiz shifoxonalarida o`tkazilayotgan shunday murakkab operasiyalar ko`plab yurtdoshlarimiz og`irini engil, uzog`ini yaqin qilmoqda. Eng muhim, kelajakka ishonch, hayotga muhabbat va islohotlar samarasidan bahramandlik tuyg`usini bermoqda.
