Kecha, 4 iyul kuni ijtimoiy tarmoqlarda huquq-tartibot organi xodimi o`g`rilikda shubhalangan ayolni haqoratlagan videotasvir tarqalgan edi. Unda o`zi ko`rinmaëtgan erkak kishi kamera qaratilgan aëlni qattiq haqorat bilan kiyimlarini echishga majbur qilib, do`q-po`pisa qilgan.
Ma`lum bo`lishicha, bu voqea 3 iyun kuni Samarqand viloyati Kattaqo`rg`on shahar Ichki ishlar bo`limining binosida bo`lgan. Haqorat va tahdid ostida aëlni echinishga majburlagan shaxs IIB Jinoyat qidiruv bo`limi tergovchisi San`at Umarov ekanligi aytildi.
Majburan echintirilgan ayollar viloyat prokuroriga shikoyat qilgan.
Ushbu masala yuzasidan Bosh prokuratura matbuot xizmati bilan bog`landik. Bosh prokuratura matbuot xizmati rahbari Surayyo Rahmonovaning aytishicha, ayni paytda ushbu masala qat`iy nazoratga olingan.
Ayni paytda tergovchi qo`lga olingan, unga nisbatan Jinoyat kodeksining 206-moddasi 1-qismi (hokimiyat yoki mansab vakolati doirasidan chetga chiqish, ya`ni davlat organi, davlat ishtirokidagi tashkilot yoki fuqarolarning o`zini o`zi boshqarish organi mansabdor shaxsining o`ziga qonun bilan berilgan vakolatlar doirasidan chetga chiqadigan harakatlarni qasddan sodir etishi, fuqarolarning huquqlariga yoki qonun bilan qo`riqlanadigan manfaatlariga yoxud davlat yoki jamoat manfaatlariga ko`p miqdorda zarar yoxud jiddiy ziyon etkazilishi) bo`yicha jinoiy ish qo`zg`atilgan.
Kattaqo`rg`on IIB rahbariyatiga nisbatan xizmat tekshiruvi o`tkazilmoqda.
«Bu kishini g`azablantiruvchi holat. Mansabi va vakolatidan qat`i nazar bunday ishga mutlaqo yo`l qo`yib bo`lmaydi. Mazkur ish bosh prokurorning alohida nazoratiga olingan», — dedi Surayyo Rahmonova.
Mazkur video ijtimoiy tarmoqlarda ko`plab tanqidlarga sabab bo`ldi. Tergov organlarining bu kabi noqonuniy xatti-harakatlari hatto jinoyat sodir etgan shaxsga nisbatan ham amalga oshirilishi mumkin emas. Aybi sudda isbot etilmagan hech bir fuqaro jinoyatchi hisoblanmaydi. Qolaversa, tergov xodimining bu harakati insoniylik mezonlariga ham ziddir.
