Tadbirkorlik va shaharsozlik faoliyatini amalga oshirish uchun er uchastkalarini elektron auksion orqali doimiy foydalanishga berish tartibi to`g`risidagi Hukumat qarori qabul qilindi. Bu haqda Adliya vazirligining «Huquqiy axborot» kanali xabar berdi.
Qarorga ko`ra, bundan buyon bo`sh er uchastkalari tadbirkorlik va shaharsozlik faoliyatini amalga oshirish uchun «E-IJRO AUKSION» yagona elektron savdo maydonchasi doimiy foydalanishga beriladi.
Bunga ko`ra er uchastkalari quyidagi narxlarda belgilanadi:
- er uchastkasi maydoni 0,01 gektar bo`lganda, eng kam ish haqining ikki baravari;
- er uchastkasi maydoni 0,01 gektardan 0,05 gektargacha bo`lganda, eng kam ish haqining uch baravari;
- er uchastkasi maydoni 0,05 gektardan 0,1 gektargacha bo`lganda, eng kam ish haqining to`rt baravari;
- er uchastkasi maydoni 0,1 va undan ko`p gektar bo`lganda, eng kam ish haqining besh baravari miqdorida.
Tuman hokimining vakolatiga quyidagi erlarni ajratish kiradi:
- zaxira erlardan;
- qishloq xo`jaligi maqsadlari uchun mo`ljallangan erlardan, tubdan yaxshilash ishlari amalga oshirilgan sug`oriladigan erlar, pichanzorlar va yaylovlar bundan mustasno;
- o`rmon fondi erlaridan (o`rmon o`simliklari bilan qoplangan erlar bundan mustasno);
- sanoat, transport, aloqa, mudofaa va boshqa maqsaddagi erlardan;
- suv fondi erlaridan.
Vakolatli organlar er uchastkasini tanlashda elektron shaklda xulosalar beradi. Hokimlar bo`sh er uchastkalari bo`yicha olingan materiallarning o`z vaqtida ko`rib chiqilishi uchun shaxsan javobgar bo`ladi.
Bo`sh er uchastkalarini tanlashda Davlat sanitariya-epidemiologiya nazorati xizmatining hamda tuman ichki ishlar organlari yong`in xavfsizligi bo`limining xulosasini olish talab etilmaydi.
Auksionlar Internet tarmog`i orqali o`tkaziladi. Auksionlarni o`tkazish to`g`risidagi xabar 30 kun oldin e`lon qilinishi kerak.
Elektron auksionda ishtirok etishga buyurtmalar xabarnoma joylashtirilgan kundan boshlab operatorning veb-portalida avtomatik tarzda qabul qilinadi va auksionni o`tkazish kunidan ikki ish kuni oldin (soat 13-00 da) yakunlanadi.
Buyurtmalar elektron ko`rinishda beriladi.
Buyurtmalar elektron raqamli imzo bilan imzolanadi.
Buyurtmachi buyurtmanomaga zakalat puli to`langanini tasdiqlovchi to`lov hujjatining elektron (skaner qilingan) nusxasini ilova qilishi mumkin.
Elektron auksionda ishtirok etish uchun zakalat puli er uchastkasi minimal qiymatining 20 foizi miqdorida belgilangan.
Auksion unga qo`yilgan ikki va undan ortiq ishtirokchi mavjud bo`lgandagina o`tkaziladi.
Auksion ish kuni mobaynida soat 9.00 dan soat 18.00 gacha o`tkaziladi.
Elektron onlayn auksionni o`tkazish vaqti 3 soatdan ortiq bo`lmagan muddatga uzaytirilishi mumkin va auksion 21-00 soatga qadar yakunlanishi lozim. Oxirgi taklifni soat 21-00 ga qadar bildirgan ishtirokchi auksion g`olibi deb topiladi.
Auksionni o`tkazishda texnik uzilish sodir bo`lgan hollarda, auksion to`xtatiladi va o`tkazish vaqti haqida xabar berilgan holda uzilish bartaraf qilingan kundan keyingi kunda davom ettiriladi.
Operatordan auksion natijalari to`g`risidagi bayonnomani olgan paytdan boshlab tuman (shahar) hokimlari 3 kun mobaynida g`olibga er uchastkasini doimiy foydalanish huquqi asosida ajratish to`grisida qaror chiqarishi lozim.
