O`zbekiston Respublikasi Er resurslari, geodeziya, kartografiya va davlat kadastri davlat qo`mitasi huzuridagi "Geoinnovasiya markazi" DUK va Xitoyning dronlar ishlab chiqaruvchi "BShark Holdings LTD" kompaniyasi o`rtasida O`zbekistonda uchuvchisiz texnologiyalarni rivojlantirish sohasida hamkorlik to`g`risida memorandum imzolandi, deb xabar qilmoqda O`zA.
Hujjat O`zbekiston delegasiyasining Xitoyning Shenchjen shahriga tashrifi doirasida imzolandi.
"Geoinnovasiya markazi" DUK ma`lumotlariga ko`ra, korxonalar birgalikdagi sa`y-harakatlar bilan O`zbekistonda uchuvchisiz uchish apparatlari ishlab chiqarishni mahalliylashtirish niyatida. Memorandum shuningdek, hamkorlikda o`qitish dasturlarini ishlab chiqish, seminarlar o`tkazish, uchuvchisiz texnologiyalarni rivojlantirish sohasida mutaxassislar, axborot va tajriba almashinuvini ko`zda tutadi.
"BShark Holdings LTD" kompaniyasi O`zbekistonga zarur ishlab chiqarish uskunalari va texnologiyalarni etkazib berish, mahalliy xodimlarni o`qitish, savdo va marketing bo`limlarini tashkil etishni mo`ljallamoqda.