21 oktyabr, taxminan soat 12.00 da Sergeli ichki ishlar bo`limiga Toshkent shahri Sergeli tumanidagi mashina bozori hududida erkak qo`lida to`pponcha bilan yurgani haqida xabar kelib tushgan.
Voqea joyiga etib kelgan IIBB va Milliy gvardiya xodimlari Yunusobodda yashovchi 39 yoshli N.A.ni qo`lga olgan. Undan "Makarov" pnevmatik to`pponchasi va "kukri" pichog`i olib qo`yilgan.
Sergeli IIBga keltirilgan N.A. bozorga qarindoshiga tegishli "Matiz" va "Epica" avtomashinalarini sotish uchun kelganini, hech kimga zarar etkazmoqchi bo`lmaganini va qarindoshining tug`ilgan kunini o`ziga xos usulda nishonlash uchun havoga o`q uzganini aytgan. Hodisa oqibatida hech kim jabrlanmagan.
Toshkent shahar IIBBning ma`lum qilishicha, qo`lga olingan erkakning shaxsi aniqlanganda u ruhiy-nevrologik dispanserda ro`yxatda turishi aniqlangan va davolash muassasasiga joylashtirilgan.
