Toshkent viloyati bojxona boshqarmasining “G`ishtko`prik” chegara bojxona posti xodimlari respublikamizdan piyoda ravishda chiqib ketayotgan fuqaroning qing`ir qilmishlarini fosh etishdi. Ushbu shaxs yo`lovchi bojxona deklarasiyasida va bojxona xodimlarining og`zaki so`rovi paytida ma`lum qilmasdan turib, 7900 AQSh dollarini olib chiqib ketishga uringan ekan.
Mazkur post xodimlari aniqlagan yana bir qonunbuzilish xolatida esa fuqaro T.S.ning qo`l yuklari bojxona ko`rigidan o`tkazilganida, ushbu shaxs egnidagi kurtkasi va shimining cho`ntaklariga yashirib, naqd xorijiy valyutalarni olib chiqmoqchi bo`lganligi fosh bo`ldi. Natijada, bojxona xodimining og`zaki so`rovda taqdim qilinmagan hamda yo`lovchi bojxona deklarasiyasida yozib ko`rsatilmagan holda 1200 AQSh dollari va 1 mln. 37 ming 500 qozoq tengesining yashirinicha olib chiqilshi oldi olindi.
Fuqaro A.D. esa yo`lovchi bojxona deklarasiyasida ko`rsatilgan 5000 AQSh dollaridan tashqari, egnidagi kurtkasining chap cho`ntagi astari ichiga 1250 AKSh dollarini yashirib “G`ishtko`prik” chegara posti orqali qo`shni davlatga olib o`tayotganligi aniqlandi.
Toshkent viloyati bojxona boshqarmasi Kontrabanda va bojxona qonunbuzilishiga qarshi kurashish bo`limi hamda huquqni muhofaza qiluvchi boshqa idoralar vakillari bilan xamkorlikda “G`ishtko`prik” chegara bojxona postiga piyoda xolda kirib kelgan A. M. tezkor kuzatuvga olindi.
Natijada, ushbu shaxs bojxona nazoratidan o`tgandan so`ng pasport nazorati oldida tashmachi fuqarolardan o`zbek milliy valyutasini yig`ib olayotgan vaqtida fosh qilindi. Uning qo`l yuklari xolislar ishtirokida ko`zdan kechirilganida tashmachi fuqarolar yordamida jami 27 mln. so`mni noqonuniy ravishda qo`shni davlatga olib o`tayotganligi ma`lum bo`ldi.
Toshkent viloyati bojxona boshqarmasining “Farxod” chegara bojxona postiga piyoda xolda kirib kelgan fuqaro R.N. shaxsiy ko`rikdan o`tkazilganda esa egnidagi kurtkasining ichki chuntagida yo`lovchi bojxona deklarasiyasida ko`rsatilganidan tashqari yashirib, 10 mln so`mini qo`shni davlatga olib chiqib ketayotganligi aniqlandi.
Hozirda mazkur holatlar yuzasidan bojxona tekshiruvlari davom ettirilmoqda.
