2014 yilning 10 noyabr kuni O`zbekiston Respublikasi Tashqi ishlar vaziri Abdulaziz Komilov O`zbekistonga tashrif buyurgan Yaponiya Tashqi ishlar vaziri o`rinbosari Kentaro Sonourani qabul qildi. Bu haqda O`zbekiston Tashqi ishlar vazirligi axborot xizmati xabar bermoqda.
Delegasiya dasturida Hukumatda, Tashqi ishlar hamda Tashqi iqtisodiy aloqalar, investisiya va savdo vazirliklarida ikki tomonlama muzokaralarni o`tkazilishi o`rin oldi.
Bo`lib o`tgan suhbat chog`ida O`zbekiston — Yaponiya munosabatlarini mustahkamlashning ustuvor yo`nalishlari, xalqaro va mintaqaviy muammolar mufassal muhokama qilindi.
Ta`kidlab o`tilganidek, o`zaro konstruktiv aloqalarni rivojlantirishda to`plangan tajriba ikki tomonlama formatda va xalqaro tashkilotlar, shu jumladan, «Yaponiya + Markaziy Osiyo» mintaqalararo muloqoti doirasida samarali hamkorlikni ta`minlaydi.
Uchrashuvda turli sohalardagi manfaatli strategik hamkorlikni yanada oshirish, yuqori texnologik sarmoyaviy qo`shma loyihalarni amalga oshirish jarayoni, o`zaro savdoni rivojlantirish, O`zbekiston iqtisodiyotining istiqbolli jabhalarida etakchi yapon korxonalarining ishtirokini kengaytirishga ikki tomon ham birday qiziqishi tasdiqlandi.
Muzokaralarda Yaponiyaning Favqulodda va muxtor elchisi Kato Fumihiko ham ishtirok etdi.
