Keyingi yillarda Guliston o`z nomiga monand obod bo`lib bormoqda. Yangi uy-joylar, inshootlar, ravon yo`llar qurilmoqda.
Shaharning yangi qiyofasi “Buyuk kelajak” mavzesida yorqin namoyon bo`ladi. O`tgan yili bu erda namunali loyiha asosida 5 qavatli 8 ta uy foydalanishga topshirildi. Yana 7 qavatli, 420 xonadondan iborat 10 ta uy qurilishi davom etmoqda.
Prezidentimiz mazkur mavzega tashrif buyurib, yangi ko`p qavatli uylarni ko`zdan kechirdi.
Prezident “Sirdaryo tajribasi”ni joriy qilish loyihalarini ko`zdan kechirdi.
Shu erda yoshlarni madaniyat va sport majmualariga jalb etish, ular o`rtasida kompyuter savodxonligi va kitobxonlikni rivojlantirish bo`yicha yangi tizim taqdimoti o`tkazildi.
Unga ko`ra, Yoshlar ittifoqi, Sport, Madaniyat va Xalq ta`limi vazirliklari, Ma`naviyat targ`ibot markazi, Yozuvchilar uyushmasi tumanlardagi yoshlar bilan manzilli ishlaydi, ularning qiziqishlariga mos to`garak va muassasalarga jalb etadi. Axborot va ommaviy kommunikasiyalar agentligi «O`qituvchi» brendi ostida markaziy kitob do`koni va «buk-kafe»lar tashkil etadi, shuningdek, elektron kitoblar tayyorlab tarqatadi.
- Bilim, madaniyat, fidoyilik birinchi o`rinda bo`lishi kerak. Ma`naviyat iqtisodiyotga ham asos bo`ladi. Farzandlarimizni sog`lom, bilimli, vatanparvar qilib tarbiyalash uchun hech narsani ayamaymiz. Ana shunday yoshlar bizning ertangi kunimiz, dedi Shavkat Mirziyoev.
Viloyatda ko`p qavatli uylar va sport inshootlari qurish, ichimlik suvi ta`minoti va oqova suv tizimini rivojlantirish borasida amalga oshiriladigan ishlar haqida ham ma`lumot berildi.
