Hukumat qarori bilan O`zbekiston Respublikasi Xalq ta`limi vazirligi huzuridagi Xalq ta`limini rivojlantirish jamg`armasi hamda byudjetdan tashqari Respublika maqsadli kitob jamg`armasi to`g`risidagi nizomlar tasdiqlandi. Bu haqida "Huquqiy axborot" kanali ma`lum qildi.
Nizomga muvofiq, Xalq ta`limini rivojlantirish jamg`armasining asosiy vazifasi Xalq ta`limi vazirligi tizimiga kiruvchi ta`lim muassasalarini, Mehribonlik uylari, Bolalar shaharchalarini qurish uchun mablag` jamlash hisoblanadi.
Boshqaruv kengashi Jamg`armaning yuqori organi hisoblanadi, Jamg`armaning ijro etuvchi direksiyasi ijro organi hisoblanadi.
Direksiya har yili navbatdagi yil uchun Jamg`armaning daromadlari prognoz rejasini tasdiqlaydi.
Jamg`arma mablag`laridan maktablar qurish, rekonstruksiya qilish va mukammal ta`mirlash, shuningdek, maktablarni jihozlash uchun foydalaniladi.
Respublika maqsadli kitob jamg`armasining asosiy vazifasi maktablarning kutubxona jamg`armalari uchun darsliklar va o`quv-metodik majmualar bilan ta`minlashga qaratilgan byudjet mablag`lari va homiylik xayriyalari, xalqaro moliya institutlarining kredit va grantlari, darsliklarning ijara to`lovini jamlash va ulardan samarali foydalanish hisoblanadi.
Vasiylik kengashi Jamg`armaning yuqori boshqaruv organi hisoblanadi hamda uning tarkibi Hukumat tomonidan tasdiqlanadi.
Jamg`arma quyidagilar uchun darsliklar etkazib berishga mablag` ajratadi:
• birinchi sinf o`quvchilari uchun;
• “Mehribonlik” uylari tarbiyalanuvchilari, jismoniy yoki psixik rivojlanishida nuqsoni bo`lgan bolalar uchun ixtisoslashtirilgan maktablar va maktab-internetlarning o`quvchilari uchun;
• ijtimoiy yordamga muhtoj bo`lgan oilalardagi o`quvchilar uchun;
• ijara asosida berish uchun;
• o`qituvchilar uchun.
