Giyohvandlik hozirgi kunda inson hayotiga xavf solishi bilan bir qatorda eng jiddiy va global muammoga aylanib borayotgani hech kimga sir emas. Uning oqibatida qanchadan-qancha insonlar salomatligini yo`qotib, ko`plab oilalarning tinchi buzilmoqda.
Shu bois giyohvandlikka qarshi kurashish va bu illatning zararli oqibatlarini bartaraf etish maqsadida barcha huquqni muhofaza qilish organlari singari bojxona tizimida ham tizimli chora-tadbirlar amalga oshirilmoqda.
Xususan, Toshkent viloyati bojxona boshqarmasi Kontrabanda va bojxona qonunchiligi buzilishiga qarshi kurashish bo`limi xodimlari tomonidan o`tkazilgan tezkor tadbir fikrimizga amaliy misol bo`ladi.
Kuni kecha “Giyohvand moddalarni qidirish” yo`nalishda maxsus o`rgatilgan “Ketti” laqabli xizmat iti yordamida Toshkent viloyati, Chinoz tumani hududida tezkor tadbir o`tkazildi. Bu haqda Davlat bojxona qo`mitasi axborot xizmati xabar bermoqda
Tadbir davomida fuqaro S.A. ga qarashli Toshkent viloyati Chinoz tumanida joylashgan dala maydonlari xolislar ishtirokida ko`zdan kechirilganda, katta ariq bo`yida 200tup va mevali daraxtlar atrofida
36 tup “Nasha” giyohvandlik o`simliklari o`sib turganligi aniqlandi va voqea joyida yoqish yo`li bilan yo`q qilindi.
Hozirda mazkur holat yuzasidan bojxona organlari tomonidan surishtiruv harakatlari olib borilmoqda.
Shu o`rinda Toshkent viloyati bojxona boshqarmasi fuqarolardan shunga o`xshash holatlar yuzasidan Davlat bojxona qo`mitasining 11-08 yoki Toshkent viloyati bojxona boshqarmasining (371) 235-07-61 raqamli ishonch telefonlariga murojaat etishlari mumkinligini eslatib o`tadi.
Ma`lumot bergan shaxslarning ma`lumotlari sir saqlanishi kafolatlanadi.
