2019 yil 11 oktyabr kuni Samarqand shahrining 80, 98 hamda 106-sonli maktabgacha ta`lim muassasalarida 12 nafar tarbiyalanuvchilari zaxarlanganligi holati yuzasidan jinoyat ishi qo`zg`atilib, tergov harakatlari olib borilayotganligi hamda shu jarayonda viloyat DSENM tomonidan qayd etilgan MTM faoliyatlari vaqtincha to`xtatilganligi haqida xabar berilgan edi.
14 oktyabr kuni esa “Sevimli” telekanali orqali yuqoridagi MTMlarning faoliyati vaqtincha to`xtatilganligiga qaramasdan faoliyat yuritayotganligi haqida tanqidiy lavha efirga uzatildi.
Ushbu ma`lumotlar prokuratura tomonidan o`rganilganda, haqiqatdan ham ushbu MTMlar 12.10.2019 yil kuni qisman bolalarni qabul qilib, faoliyat yuritganliklari aniqlandi. Bu haqda O`zbekiston Respublikasi Bosh prokuraturasi jamoatchilik bilan aloqalar va huquqiy axborot bo`limi boshlig`i Xayot Samsutdinov o`zining telegram kanalida ma`lum qildi.
Xususan, shahar DSENM tomonidan 98 va 106-sonli MTMlar faoliyatni vaqtincha to`xtatish haqidagi qarorlari, kechikib MTM rahbarlariga taqdim qilinganligi sababli qisman faoliyat yuritgan.
Yuqoridagilarga ko`ra, Samarqand shahar prokurori tomonidan viloyat DSENM bosh vrachi va viloyat maktabgacha ta`lim boshqarmasi boshlig`i nomiga 2 ta taqdimnoma kiritildi.