Qiyoslashdan o`tkazish uchun qaerga murojaat qilish kerak?
Davlat xizmatlari markazlariga (DXM) jismoniy va yuridik shaxslar shaxsan o`zlari borib yoki Yagona interaktiv davlat xizmatlari portali (YaIDXP) orqali elektron shaklda murojaat etadilar. Bunda, maishiy iste`molchilardagi hisoblagichlarni qiyoslashdan o`tkazish uchun DXMlarga yoki YaIDXPga hududiy elektr tarmoqlari korxonasi (HETK) murojaat etadi.
Hisoblagichni echish, qiyoslashdan o`tkazishga topshirish hamda qayta o`rnatish ishlari bilan kim shug`ullanadi?
Hisoblagichni echish, qiyoslashdan o`tkazishga topshirish va o`rnatish HETK tomonidan amalga oshiriladi.
Bunda barcha jarayonlarda MIBning hududiy bo`linmalari HETK bilan hamkorlik qiladi, hisobga olish uskunalariga tamg`a (plomba) qo`yadi.
Hisoblagichlar har yili qiyoslashdan o`tkaziladimi?
Yo`q. 2019 yil 1 noyabrdan boshlab hisoblagichlarni qiyoslash davriyligi jismoniy shaxslar uchun - 8 yil (hozir 4 yil), yuridik shaxslar uchun - 4 yil (hozir 2 yil)ni tashkil etadi.
1 noyabrga qadar berilgan qiyoslash sertifikatlari nima bo`ladi?
Ushbu sertifikatlarning amal qilish muddati o`z kuchida qoladi.
Hisoblagichning qiyoslash muddati kelganini qaerdan bilsa bo`ladi?
Hisoblagichning qiyoslash sertifikatida uning amal qilish muddati ko`rsatilgan bo`ladi. Bundan tashqari, HETK tomonidan 30 kun oldin bu haqda yozma ravishda ogohlantirish beriladi.
Qancha to`lov to`lanadi?
• jismoniy shaxslardan bazaviy hisoblash miqdorining (BHM) 20 foizi (44 600 so`m);
• HETKdan (maishiy ehtiyojlar uchun elektr energiyasidan foydalanuvchi jismoniy shaxslar uchun) BHMning 15 foizi (33 450 so`m);
• yuridik shaxslardan BHM 1,5 baravari (334 500 so`m) miqdorida yig`im undiriladi.
Eslatma: YaIDXP orqali murojaat qilinganda, yuqoridagi summalarning 90 foizi miqdorida yig`im undiriladi.
To`lovlar qaerga to`lanadi?
DXMlarga murojaat qilinganda ushbu markazlardagi kassalarga, YaIDXP orqali murojaat qilinganda esa to`lov ushbu portal orqali amalga oshiriladi.
Qiyoslashdan o`tkazish uchun qancha vaqt ketadi?
Bu 3 bosqichda amalga oshiriladi:
• 1-bosqich – so`rovnoma (ariza) kelib tushganidan so`ng 5 ish kunida hisoblagich echib olinadi;
• 2-bosqich - 3 ish kuni ichida metrologiya xizmati tomonidan hisoblagich qiyoslashdan o`tkaziladi;
• 3-bosqich - qiyoslashdan o`tkazilgandan keyin 3 ish kuni ichida o`rnatiladi.
Qiyoslashdan o`tkazishda hisoblagich yaroqsiz ekanligi aniqlansa nima bo`ladi?
Hisoblagichning yaroqsizligi haqidagi metrologiya xizmatining xabarnomasi asosida HETK hisobga olish uskunasini 3 ish kunida ta`mirlash yoki yangisiga almashtirish chorasini ko`radi.
Hisoblagichni ta`mirlash yoki yangisiga almashtirish xarajatlarini kim to`laydi?
Hisoblagichni ta`mirlash yoki yangisiga almashtirishga doir sarf-xarajatlar HETK tomonidan qoplanadi.
Hisoblagichlar qiyoslashdan o`tkazish uchun echib olinganda to`lovlar qanday hisoblanadi?
Etkazib berilgan elektr energiyasi uchun hisob-kitob hisoblagich echib olingunga qadar bo`lgan oldingi 3 hisob-kitob oyidagi o`rtacha sarfdan kelib chiqib aniqlanadi.
Hisoblagichni qiyoslashdan o`tkazilganligi bo`yicha biror bir hujjat beriladimi?
Ha. Metrologiya xizmati tomonidan hisoblagichning qiyoslashdan o`tkazilganligi haqida sertifikat beriladi.
