Samarqand shahri kuni keng nishonlandi

1996 yil 18 oktyabr kuni Amir Temur bobomizning 660 yillik yubileyida Samarqand shahri “Amir Temur” ordeni bilan taqdirlangan va 18 oktyabr Samarqand shahar kuni deb belgilangan edi. Shundan buyon ushbu kun viloyatda keng nishonlanadi.

Erta tongdan karnay-surnay sadolari yangrab barchani bayramga chorladi. Asosiy tadbirlar ekomarafon bilan boshlandi. “Biz kelajak uchun javobgarmiz!” shiori ostida o`tkazilgan ushbu “ARAL MARATHON” xalqaro ekologik marafonda 7 yoshdan 70 yoshgacha bo`lgan minglab fuqarolar ishtirok etishdi.

Viloyat jamoatchiligi vakillari Sohibqiron Amir Temur maqbarasini ziyorat qildilar. Bu erda o`tgan buyuk ajdodlarimiz ruhiga bag`ishlab Qur`on tilovat qilindi. Shundan so`ng viloyat va shahar hokimliklari, korxona va tashkilotlar, ta`lim muassasalari tomonidan Amir Temur haykali poyiga gul qo`yildi.

Samarqand shahri kuni tadbirlari doirasida shahardagi 7 ta maskan – Kimyogarlar qo`rg`oni, Farhod va So`lim shaharchalarida, Registon maydoni, Islom Karimov ko`chasi hamda Alisher Navoiy, “Yoshlik” nomli madaniyat va istirohat bog`lari, Hamid Olimjon nomidagi viloyat musiqali drama teatri oldidagi maydon va boshqa joylarda ommaviy xalq sayillari, madaniy-ma`rifiy tadbirlar, tanlovlar va taniqli san`atkorlar ishtirokida konsert dasturlari bo`lib o`tdi. 

Alisher Navoiy nomidagi markaziy istirohat bog`ida o`tkazilgan sayilda 150 kilogrammlik osh damlandi.

Bayram tadbirlari doirasida Alisher Navoiy ko`chasida “Tabiat saxovati” yarmarkasi ochildi. Unda viloyatda etishtirilgan qishloq xo`jaligi mahsulotlari va qayta ishlangan iste`mol mollari savdosi o`tkazilmoqda. Mazkur yarmarka 20 oktyabrga qadar davom etadi.