Fuqarolik ishlari bo`yicha Kattaqo`rg`on tumanlararo sudining sud hujjatiga asosan qarzdor O.Bozorov tomonidan undiruvchi D.Raxmonovaning foydasiga ikki nafar farzandining voyaga etgunlariga qadar moddiy ta`minoti uchun har oydagi ish haqi va boshqa daromadlarining uchdan bir qismi miqdorida aliment pulini to`lab borishi belgilangan.
Biroq qarzdor O.Bozorov aliment pullarini to`lashdan qasddan bo`yin tovlab kelgan. Shu sababli Kattaqo`rg`on shahar ma`muriy sudining qarori bilan O.Bozorov O`zbekiston Respublikasi Ma`muriy javobgarlik to`g`risidagi Kodeksning 47(4)-moddasi bilan 15 sutka ma`muriy qamoq jazosi tayinlangan.
Fuqaro O.Bozorov qo`llanilgan jarima jazosidan so`ng ham o`ziga tegishli tegishli xulosa chiqarmasdan, voyaga etmagan farzandini moddiy ta`minlashdan qasddan muttasil ravishda bo`yin tovlab kelgan.
Natijada uning qarzdorligi 2015 yilning iyun oyidan shu yilning oktyabr oyiga qadar hammasi bo`lib 30 mln. 548 ming so`mni tashkil etgan.
Mazkur holat yuzasidan Majburiy ijro byurosi Kattaqo`rg`on tuman bo`limi tomonidan fuqaro O.Bozorovga nisbatan O`zbekiston Respublikasi Jinoyat Kodeksining 122-moddasi 1-qismi bilan jinoyat ishi qo`zg`atilib, surishtiruv harakatlari olib borilmoqda.