O`zbekistonda 2011—2012 yillarda Islom Karimovni hokimiyatdan chetlatish va o`sha vaqtda bosh vazir lavozimida faoliyat olib borgan Shavkat Mirziyoevni o`ldirishni maqsad qilgan to`ntarish rejalashtirilgan.Bu haqida 21 oktyabr kuni Toshkentda o`tkazilgan matbuot anjumanida Jasliq qamoqxonasida o`tirib chiqqan «Aliev zargari» (Gold Center) zargarlik kompaniyasi rahbari Ahmed Aliev ma`lum qilgan.
Ahmed Aliev 2012 yili hibsga olingan, unga nisbatan Jinoyat kodeksining 23 ta moddasi bo`yicha ayblov e`lon qilingan. 2013 yili esa u uyushgan jinoiy guruh tuzishda aybdor deb topilib, 20 yilga ozodlikdan mahrum etilgan edi. 2019 yil sentyabrida esa jinoyat ishlari bo`yicha Toshkent viloyati sudi «Aliev ishi»ni qayta ko`rib chiqib, uni sud zalidan ozod qilgan edi.
Alievning so`zlariga ko`ra, uning qamalishiga bir tomondan iqtisodiy, boshqa tomondan esa siyosiy sabablar bo`lgan. Uning o`zi qamalishida siyosiy sabablarni asosiy rol o`ynagan deb hisoblaydi.
«2011—2012 yillarda O`zbekistonda davlat to`ntarishi tayyorlangan. Agar o`sha to`ntarish amalga oshsa, o`sha vaqtdagi prezident Islom Karimov lavozimidan chetlatilardi. O`sha davlat to`ntarishi doirasida o`sha vaqtda bosh vazir lavozimida bo`lgan Shavkat Mirziyoev jismonan yo`q qilingan bo`lardi. Takrorlayman, uni jismonan yo`q qilishmoqchi edi. Meni shu to`ntarish haqida bilib qolganim uchun qamashgan», — deydi Ahmed Aliev.
Taniqli zargarning ta`kidlashicha, «Shavkat Mirziyoevni jismonan yo`q qilish rejasi ortida shaxsan general Shuhrat G`ulomov turgan». Aliev, shuningdek, 2019 yilgi apellyasiya sudlarida aytgan gaplarini takrorlagan — 2014 yili unda to`ntarish bo`yicha bilganlarini oshkor qilish imkoniyati tug`ilgan, yozganlari kerakli odamlargacha etib bormagan bo`lsa-da, keyinchalik aynan uning yozganlari asosida huquq-tartibot organlari yuqori martabali amaldorlarga nisbatan jinoyat ishi ochgan.
Ma`lumot uchun, MXX (hozirgi DXX)ning sobiq birinchi o`rinbosari Shuhrat G`ulomov 2017 yili O`zbekiston Harbiy sudi tomonidan konstitusiyaviy tuzumga tajovuz qilish va giyohvand moddalar kontrabandasini tashkil etishda aybdor deb topilib, umrbod ozodlikdan mahrum etilgan edi. Shavkat Mirziyoev uni «sotqin» deb atagan edi.
