Doktor Ochko`zboev huzuriga hamshirani chorlab dedi:
- Operasiyaga hamma narsa taxtmi?
- Bemorni olib chiqaversak bo`ladi.
- Operasiya xonasidagi tayyorgarlikni so`rayotganim yo`q. Bemor tayyormi, deyapman.
- Tushunmadim... – dedi hamshira.
- Hay, nimaga tushunmaysiz? Shuncha yil qaerda ishlagansiz o`zi? Buncha go`l bo`lmasangiz?! Bemor shifoxonada yotsa-yu, doktorning “stavka”sini bilmasa, bu nima degan gap. Har safar ukol qilganingizda shipshitib qo`ymaysizmi?
- Men “stavka”larni qanchaga o`zgarganini bilmayman, – dedi hamshira. – O`tgan operasiyada doktor To`ymasov “stavka”larni oshirish kerak, degan edi.
- Hali mening “stavkam”niyam bilmassiz, - dedi Ochko`zboev.
- Yo`q, doktor.
- Rahmat-ey, qo`lingizga qog`oz ruchka oling. O`zim “stavka”larni belgilab beraman. Xo`sh, operasiya qiluvchi doktorga bir million so`m. Innan keyin, “narkozchi”ga besh yuz ming so`m, qon quyuvchiga uch yuz. Yozayapsizmi? Yana adashib ketmang!
– Ha, doktor yozayapman.
– Katta hamshiraga yuz ming. Xo`sh, endi kim qoldi?
–Bizlar qoldik, – dedi hamshira.
–Sizlardek kichik hamshiralarga sakson ming.
–Doktor, iltimos, – dedi qo`lida ruchkasini o`ynatib kichik hamshira, – menikiniyam katta hamshiraga tenglashtiravering.
–Mayli, sazangiz o`lmasin. Yuz ming so`m, deb yoza qoling. Xo`sh, yana kim qoldi?
–Farrosh qoldi.
–Esdan chiqib qolayotgan ekan. Yigirma ming yozib qo`ya qoling. Mana shu yozganlaringizning stolingizning biror joyiga yashirib qo`ying! Esingizdan chiqqanida qarab-qarab qo`yasiz. Bugundan boshlab yangi “stavka”larni operasiya qilinuvchi bemorlarga asta shipshiting.
Bir pasdan keyin operasiya qilinuvchi bemor Ochko`zboev huzuriga kirib dedi:
–Doktor, hamshiraga operasiyani to`xtatib turamiz, debsiz. Yana “stavka”lar deydimiey, tushunmadim. Doktor o`zingiz dangal aytib qo`yaqoling!
– O`zingizdan qolar gap yo`q, - dedi Ochko`zboev. - Nima desam ekan, endi hamma joyda doktorga qo`l haqi...
- Ha, endi tushundim, – dedi bemor. – Ayting, men tayyorman.
Doktor Ochko`zboev hamshiraga yozdirgan “stavka”larni eslatdi.
–Shunaqa deng, – dedi bemor. – Mening ham sizga atagan eng zo`r “stavkam” bor.
–So`raganimdan ham ziyod bermoqchimisiz, –dedi Ochko`zboev. –Qancha bermoqchisiz?
– Besh yil.
–Nima deysiz? Qaerdansiz? Kimsiz o`zi?
–Men tegishli joydan Ushladiboevman. Sizni ancha vaqtdan beri ushlay olmay yurgandik. Qani ketdik.
–Qaerga?
– Tegishli joyga. O`rgildim sizdaqa “stavka”chidan.
Bardi JUMANIYoZOV.