Joriy yildan O`zbekistonda energiya samarador qishloq turar-joy binolari qurish ishlari boshlangan. Bugungi kunda 22 ta energiya samarador uylar loyihasi ishlab chiqildi. Natijada 15 010 ta arzon qishloq turarjoylari Davlat energo samarador turarjoy ommaviy qurilish dasturiga kiritildi...
BMT Taraqqiyot dasturi va O`zbekiston Qurilish vazirligi hamkorligidagi biznes-forumida energiya samaradorligi va kam uglerodlar bozorida mavjud bo`lgan echimlar namoyish etildi.
Quyosh energiyasidan olinadigan elektr arzonlashadi
Forumga tashrif buyurgan soha vakillari quyosh-elektr stansiyalarining ahamiyati va uning narxidagi o`zgarishlar haqida gapirdi:
Farruh ASROLXO`JAEV, "Solar Nature" MChJ vakili :
— Biz quyosh-elektr stansiyalarini quramiz va aholiga etkazib beramiz. Bundan tashqari, bizda quyosh-suv isitish uskunalari bor hamda quyosh orqali ko`chalarni yoritish chiroqlari mavjud. Biz hozirgi kunda BMT Taraqqiyot dasturi bo`yicha qishloq qurilish namunaviy uylariga quyosh fotoelektr stansiyalarini qurib, etkazib beryapmiz. Hozir chekka qishloqlardagi xonadonlar ham quyosh energiyasidan foydalanib, uylarini yoritishmoqda va issiq suvdan foydalanyapti. To`g`ri, hozirda uning narxi an`anaviy elektr energiyaga nisbatan qimmat. Lekin narxlarda uzluksiz o`zgarish yuz bermoqda. Bora-bora quyosh energiyasidan olinadigan elektr an`anaviy elektrga nisbatan arzonlashadi.
Qishloqlarda ilk bor kam uglerodli 800 ta xonadon quriladi
Bu yil tajriba sifatida qishloq hududlarda 800 ta kam uglerodli uylar quriladi. 2019 yil uyning faqat yorug`lik xizmati quyosh panellarga ulangan. 2020 yilda bu yilgi uylarning samaradorlik natijasi tahlil qilinib, 2021 yildan muzlatgich va boshqa uy jihozlari ham quyosh panellariga ulanadi. Shuningdek, sinov tarzida 800 ta uy oldiga suv isitgichlari ham qo`yiladi.
