Xorazmlik faol jurnalist Davlatnazar Ro`zmetov avtohalokatda vafot etgani haqida xabar bergandik. Ijtimoiy tarmoqlarda esa jurnalistning o`limi uyushtirilgani haqida turli "postlar" qoldirila boshlangandi. Bosh prokuratura esa bu holatga aniqlik kiritgandi.
O`zbekiston Respublikasi IIV Axborot xizmati ham chetda tomoshabin bo`lib turmoqchi emas. Gap shundaki, Xorazm viloyati “Jamiyat” gazetasi muxbiri Davlatnazar Ro`zmetovni yo`l-transport hodisasi oqibatida vafot etgani yuzasidan ijtimoiy tarmoqlarda tarqatilayotgan noo`rin xabarlarga oydinlik kiritish hamda asl holatni keng jamoatchilikka etkazish maqsadida, O`zbekiston Respublikasi IIV Axborot xizmati ommaviy axborot vositalari vakillarini ertaga matbuot anjumaniga taklif etdi.
Unda Ichki ishlar vazirligi va Xorazm viloyati Ichki ishlar boshqarmasi mutassadi xodimlari ishtirok etishi ko`zda tutilgan.
“Jamiyat” gazetasi muxbiri Davlatnazar Ro`zmetovning vafoti bilan bog`liq barchani qiziqtirgan savollarga ertaga saytimiz orqali javob topishingiz mumkin.
