Toshkent viloyati paxtakorlari qariyb 220 ming tonnalik ulkan xirmon bunyod etib, davlatga paxta sotish rejasini ortig`i bilan bajardi.
Joriy mavsum viloyatda 73 ming gektarda g`o`zaning serhosil, mahalliy iqlimga mos navlari parvarishlanib, mo`l hosil etishtirildi. Hududning o`ziga xos geografik iqlim sharoitidan kelib chiqib, yig`im-terim mavsumi boshqa hududlarga nisbatan kechroq boshlangan bo`lsa-da, paxtakorlar tomonidan belgilangan marra zabt etildi.
Bu borada ayniqsa, Chinoz, Quyi Chirchiq, Piskent va O`rta Chirchiq tumani paxtakorlari yuqori hosildorlikka erishib, belgilangan rejani ortig`i bilan bajargani qo`l keldi.
Jumladan, chinozlik paxtakorlar joriy mavsum 18 ming 600 tonna paxta topshirish majburiyati olib, amalda qabul punktlariga qariyb 21 ming tonna paxta topshirdi. Quyi Chirchiq tumani mirishkorlari esa 27 ming tonna o`rniga qariyb 30 ming tonna paxta topshirib, belgilangan rejani 10 foiz ortig`i bilan uddaladi.
8 ming 100 gektardan ortiq maydonga chigit qadab, mo`l hosil etishtirgan piskentlik paxtakorlar ham peshqadamlar qatoridan o`rin oldi. Ayni paytga qadar piskentliklar qabul punktlariga 23 ming 400 tonna o`rniga 25 ming tonnadan ortiq paxta topshirdi. Shuningdek, 26 ming 100 tonna paxta topshirish majburiyatini olgan O`rta Chirchiq tumani paxtakorlari ham rejani 6 foiz ortig`i bilan bajarib, viloyat bo`yicha paxta rejasi bajarilishiga munosib hissa qo`shdi.
