Farg`onadagi dastlabki osmono`par binolar Namangandagi «Smart City»da quriladi
Shtab-kvartirasi Dubayda joylashgan «MJ Developers» xalqaro qurilishi kompaniyasi «Namangan Square» loyihasi ijrosiga kirishilganini rasman e`lon qildi. Vodiydagi birinchi «Smart City» ekanligi aytilayotgan mazkur shaharcha Namangan aeroporti yaqinidagi 18 gektar maydonda quriladi.
Zamonaviy shaharcha mashhur hind arxitektori Xafiz Kontraktor tomonidan loyihalashtirilgan. U ilg`or «yashil texnologiya»larga urg`u bergani aytilmoqda. Ya`ni shaharchada ofis va turarjoylar, savdo majmualaridan tashqari, noyob landshaft dizaynga ega park, golf klubi barpo etiladi. Bunda gullar shahrining bog`dorchilikdagi qadimiy an`analaridan foydalanilar ekan.
«MJ Developers» ta`sischilaridan biri Antik Jalanning aytishicha, noyob dizayn va konstruksiyali 20 qavatli qo`sh bino shaharchaning asosiy bezagiga aylanadi. Uning balandligi 100 metrdan oshadi.10 ming kishiga mo`ljallangan «Namangan Square»dagi zamonaviy uylar, asosan, to`qqiz qavatli bo`lib, ular 2021 yilda foydalanishga topshiriladi.
Kompaniya kelgusida Toshkent va Buxoro shaharlarida ham shunday yirik loyihalarni amalga oshirishni rejalashtirmoqda.
