Huquqshunos va bloger Xushnudbek Xudoyberdiev o`zining Telegram kanalida yozishicha, 22 noyabr kuni «Toshkent—Qorako`l» yo`nalishida qatnovchi avtobus Samarqand viloyatida buzilib qolgan va ancha vaqt o`tishiga qaramasdan yo`lovchilarga hech qanday yordam ko`rsatilmagan.
Blogerning xabari ostiga shunday izoh qoldirilgan:
«Assalomu alaykum, xayrli kech, mavzudan tashqari bitta iltimosim bor edi. O`zizga qanday bo`g`lanishni bilolmaganim uchun bu erga yozyapman. ‘Toshkent—Qorako`l’ yo`nalishidagi avtobus Samarqand viloyatida bugun soat 17:00 atrofida buzilib qoldi. Haydovchi yo`q, ketgan usta olib kelaman, deb haligacha daragi yo`q. MChSga tel qilindi, ammo hech kimdan xabar yo`q, qancha odamlar sovuqda qolib ketyapti kamiga yo`lovchilar tushlik ham qilishmagan»
Blogerning o`zi ham avtobusdagi yo`lovchilardan biri bilan gaplashgan (97) 280-01-02 raqam orqali.
«Haqiqatan, avtobus buzilib qolgan va ustalar kelishmagan. Avtobusda 40 nafarga yaqin yo`lovchilar bor. Sovuqda qolib ketishibdi. Avtobusning buzilib qolgan joyi taxminan Toshkentdan Kattaqo`rg`on tumaniga kiraverishga yaqin (‘Kattaqo`rg`on’ degan katta yozuvga etmasdan).
Mutasaddilar bilan bog`lanib, ushbu masalani tezda hal qilishga harakat qilamiz. Shu atrofdan o`tuvchilar yoki shu atrofda yashovchilar bo`lsa, sizlar ham yordam ko`rsasangiz yomon bo`lmasdi. Havo keskin sovib ketgan bir paytda tezroq chora ko`rilgani har tomonlama yaxshi», — deb yozadi Xushnudbek Xudoyberdiev.
Oradan biroz vaqt o`tgach, bloger Telegram kanali orqali Samarqand yo`lida buzilib qolgan avtobus masalasida tegishli mutasaddilar bilan bog`langani, zudlik bilan yordam berish choralarini ko`rish boshlangani haqida yozib qoldigan.
