Bugun, 23 noyabr kuni O`zbekiston Respublikasida xizmat ko`rsatgan jurnalist, o`zbek jurnalistikasining ko`zga ko`ringan vakillaridan biri Mahmud Sa`diy 80 yoshida vafot etdi.
Mahmud Sa`diy o`ziga xos maktab yaratgan tajribali ijodkor, iqtidorli munaqqid va ko`zga ko`ringan tarjimon edi. O`zbek adabiyotining eng dolzarb muammolari tahliliga bag`ishlangan ko`plab maqola va tadqiqotlari orasida uning adabiy-tanqidiy maqolalar va suhbatlarni o`z ichiga olgan “Teran tomirlar” kitobi alohida ajralib turadi. U O`zbekiston davlat jahon tillari universiteti xalqaro jurnalistika fakulteti talabalari uchun “Tahrir san`ati” o`quv dasturini yaratdi.
“O`zbekiston Respublikasida xizmat ko`rsatgan jurnalist” unvoni hamda “O`zbekiston Respublikasi Mustaqilligiga 15 yil” ko`krak nishoni bilan mukofotlangan. Joriy yilda esa “Fidokorona xizmatlari uchun” ordeni bilan taqdirlangan.
