Yaqinda rossiyalik jurnalistlar Moskva metrosida Ukrainaning yangi saylangan prezidenti Vladimir Zelenskiy “egizagini” topishdi. Ijtimoiy tarmoqlarda Zelenskiyga juda o`xshash kishining metroda uxlab ketayotgani aks etgan surat virus kabi tarqaldi...
Ushbu suratni ilk bor Facebook foydalanuvchisi Dmitriy Kovalenko o`z sahifasiga joylagan edi. “Mana u, haqiqiy prezident. Kortejsiz, qo`riqchisiz va hatto velosipedsiz. Oddiy va kamtar... metroda ishga ketyapti”, deb yozgan edi u surat izohiga. Shundan keyin suratdagi Ukraina prezidenti emas, balki uning qiyofadoshi ekanligi va u o`zbekistonlik Umid Isaboevligi ma`lum bo`ldi. Rossiyalik jurnalistlar uni ko`rsatuvlariga chaqira boshlashdi. Biz ham hamyurtimiz bilan yaqindan tanishdik.
— Dastlab sizni tanitgan o`sha surat haqida gaplashsak. O`shanda sizni kimdir suratga olayotganini sezganmidingiz? O`zingiz birinchi marta qaerda ko`rdingiz?
— Bu suratni menga uyimdagilar internetdan jo`natishdi, ular ham ijtimoiy tarmoqlarda tarqalganida ko`rib qolishgan. Shunda birinchi marta ko`rdim. Avvaliga hayron bo`ldim, kim va nega olgan ekan, deb. Keyinroq bilsam, ukrainalik jurnalist Dmitriy Kovalenko olgan ekan. U bilan hozirda internet orqali muloqot qilib turamiz. Uning aytishicha, Moskvaga ish bilan kelganida meni ko`chada ko`rib qolgan va Zelenskiyga o`xshatgan. Keyin ortimdan kuzatib borgan, metroga ham tushgan. Ro`paramga o`tirib, suratga olgan. Bu ishni ko`zim ilinib, biroz uyquga ketgan chog`imda qilgani uchun hech narsani sezmaganman.
— Vladimir Zelenskiy Ukraina Prezidenti bo`lmasidan avval uni tanirmidingiz? Axir u taniqli qiziqchi edi...
— Ha, qiziqchiligini, shu yo`nalishdagi ko`rsatuvlarda chiqishini eshitib yurardim, lekin unchalik qiziqishim bo`lmagani uchun ko`rmaganman.
— Birinchi marta unga sizni kim o`xshatgan?
— 2016 yili Moskva shahrida bir hamyurtimizning tug`ilgan kuniga yig`ilgandik. Uning Ukrainadan kelgan qo`shnilari ham mehmon bo`lishdi. Shunda qo`shnilardan biri menga: “Sen qiziqchi Zelenskiyga o`xshar ekansan”, dedi. Bu gapni hazilga yo`yib, kulib qo`ygandim. Metrodagi suratim tarqalgach, ko`pchilik o`xshata boshladi va Zelenskiyning “egizagi"ga aylandim-qoldim (kuladi).
— Rossiya telekanallarida ham ko`rina boshladingiz...
— “Rossiya 1” telekanalining “60 daqiqa” dasturida, NTV telekanalining “Markaziy televidenie” dasturiga taklif qilishdi. “Pervy kanal”(“Birinchi kanal”)da men haqimda maxsus lavha tayyorlandi. Mashhur boshlovchi Andrey Malaxov bilan ko`rishdim.
Ko`rsatuvning birida menga: “Ukraina prezidentiga qanday savol bergan bo`larding?” deb savol berildi. Men esa hayajondan: “Nega Siz menga bunchalik o`xshaysiz?” degan bo`lardim, deb yubordim(kuladi). Tabiatan so`zga chechan emasman.
Hozirda metroda, transportda yursam ham odamlar tanib qolishgan, ishxonada meni hazil qilib Dima Zelenskiy deb chaqirishadi. Umuman, dunyoda o`xshash insonlar ko`p, deb o`ylayman. Men ham shular qatorida bo`lsam kerak.
— Asli Namangandan ekansiz? Moskvaga sizni nima etakladi?
— Namanganning Chortoq tumani Alixon shaharchasida tug`ilganman. Bolalikdan televizorlarda Moskvani ko`rib, bir marta bo`lsa ham borishni, Kreml maydonida rasmga tushishni orzu qilardim. 1998 yil birinchi marta sayohatga otlandim. Poezdda ketayotib, derazadan uzun-uzun gumbazlarni ko`rib, shu Moskva bo`lsa kerak, deb o`ylab, poezddan tushib qolganman. Keyin bilsam bu Samara shahri ekan...
2008 yil Moskvaning o`ziga keldim. Bu erda avtoservisda ishlaydigan vatandoshlarni uchratib qoldim. Ular bilan biroz ishladim. Avtoservis rahbarlari ishimni ko`rib yoqtirib qolishdi va shu erda qolib ishlashni taklif qildi. Shu tariqa 10 yildan beri Rossiyadaman.
Shu o`rinda aytmoqchimanki, men bu erga ishsizlikdan yoki moddiy jihatdan qiyinchilikdan kelmaganman, chunki Namanganda ham ustachilik qilardim, doimiy mijozlarim va shunga yarasha daromadim ham bor edi. Yaxshi odamlar taklifini rad etolmadim.
— Kelgusi rejalaringiz qanday?
— Oilaliman, ikki farzandim bor. Ularning kamolini ko`rishni istayman. Albatta, o`ylab qo`ygan rejalarim yo`q emas. Namanganda hamma qulayliklarga ega, zamonaviy avtoservis ochmoqchiman. Ko`pchilik yoshlarimiz o`qishga topshiradi, kirolmasa, ish topolmay bekorchi bo`lib qoladi. Maqsadim — mana shunday vaqtincha ishsiz yoshlarni ish bilan ta`minlash. Yana fermerlikka qiziqaman, chorvachilik yoki tuyaqushlik fermasini tashkil qilish rejam bor.
Munisa ALIEVA suhbatlashdi
