Birlashgan Millatlar Tashkiloti (BMT)ga a`zo etti mamlakat Bosh assambleyada ovoz berish huquqidan mahrum etildi, deyiladi «Lenta.ru» xabarida.
Sababi shuki, mazkur etti mamlakat BMTga a`zolik badalini to`lamagan.
Oxirgi ikki yilda tashkilotga a`zolik badalini to`lamay qarz bo`lib qolgan Livan, Venesuela, Markaziy Afrika Respublikasi, Gambiya, Lesoto, Tonga va Yaman vaqtincha ovoz berish huquqidan mahrum etildi. Ovoz berish huquqidan mahrum etish BMT ustavining 19-moddasida belgilab qo`yilgan.
2019 yili BMTga a`zo 193 mamlakatdan 146 tasi a`zolik badalini to`ladi, 47 mamlakat esa qarzlarini yopmagan. AQSh BMTdan 491 million dollar qarzdor.
Shuning barobarida, AQSh BMTning eng yirik donori sanaladi, u tashkilotga 2,6 mlrd. dollar kiritadi, bu umumiy byudjetning 22 foiziga teng.
