Namanganda bosh miya sohasida yuqori texnologiyali jarrohlik amaliyoti mahalliy mutaxassislar tomonidan muvaffaqiyatli bajarildi. Bu haqda "Xalq so`zi" xabar berdi.
Mazkur amaliyot respublika shoshilinch tibbiy yordam ilmiy markazining Namangan filiali neyrojarrohlik bo`limida neyrojarroh Saydullo Sharifboevning tomonidan amalga oshirildi. Nafaqat muassasa, balki respublika jarrohligi tarixida ilk bor bosh miyada olib borilgan neyroendoskopik amaliyot muvaffaqiyatli yakunlandi.
— Yaponiya, Buyuk Britaniya, Rossiya va boshqa tibbiyoti rivojlangan davlatlarga xizmat safarlari chog`ida ilmiy-amaliy konferensiyalarda ishtirok etib, jahonga tanilgan olimlarning bosh miya sohasida neyrojarrohlik amaliyotlari o`tkazish bo`yicha ma`ruzalaridan zamonaviy tibbiyotdagi murakkab neyrojarrohlik amaliyotlariga qiziqib qolgandim. Keyinchalik buni yurtimizda joriy etishga urinib ko`rish uchun izlanish olib bordik. Yaponiya elchixonasi e`lon qilgan grant bo`yicha loyiha tuzdik. Natijada filial uchun 110 ming AQSh dollari miqdorida grant mablag`i ajratildi. Bu mablag`ga Germaniyaning “Karl Shtors” kompaniyasidan “Neyroendoskop” apparati xarid qilindi. Bugun mamlakatimizda yagona hisoblangan mazkur takomillashgan va qimmatbaho uskunani ishga solib, birinchi amaliyotni o`tkazdik.
Texnologiyaning afzalligi shundaki, endoskop orqali inson bosh miyasida joylashgan o`smalar mini invaziv usulda olib tashlanadi. Birinchi jarrohlik amaliyotida burun va sfenoidal bo`shliq orqali kirilib, bemordagi gipofiz bezi o`smasi bartaraf etildi.
