Koson tumanidagi 98-sonli umumiy o`rta ta`lim maktabi direktori Z.N. 800 AQSh dollari miqdorida pora olayotgan vaqtida qo`lga olindi.
Bu haqda “darakchi.uz”ga Bosh prokuratura huzuridagi iqtisodiy jinoyatlarga qarshi kurashish departamentining viloyat boshqarmasi ma`lumotlariga asoslanib viloyat hokimligi Matbuot xizmati ma`lum qildi.
Keltirilishicha, Z.N. fuqaro U.X.ga 300 AQSh dollari evaziga o`rta-maxsus darajani beruvchi qalbaki diplom tayyorlab berishni hamda 500 AQSh dollari evaziga uni ana shu “hujjat” asosida o`zi rahbarlik qilayotgan maktabga ishga qabul qilishni va`da qilib, jami 800 AQSh dollari so`ragan.
Z.N. ushbu pulni tuman xalq ta`limi bo`limi binosi oldida, o`zining boshqaruvida bo`lgan “Neksiya-3” rusumli mashinasida olgan vaqtida ashyoviy dalillar bilan ushlangan.
Mazkur holat yuzasidan Z.N.ga nisbatan O`zbekiston Respublikasi Jinoyat Kodeksining tegishli moddalari bilan jinoyat ishi qo`zg`atilib, hozirda tergov harakatlari olib borilmoqda.
