O`zbekiston oliy harbiy aviasiya bilim yurtiga Tojikiston mudofaa vazirligiga qarashli harbiy institut aviasiya fakulteti boshlig`i polkovnik Salomotshozoda Vosif Salomatsho boshchiligidagi bir guruh harbiy xizmatchilar tashrif buyurdi.
Delegasiya a`zolari O`zbekiston oliy havbiy aviasiya bilim yurtida tahsil olayotgan kursantlar uchun yaratilgan keng imkoniyatlar bilan yaqindan tanishdi. Mazkur dargohda tayyorlanadigan harbiy uchuvchilarning zamonaviy jihozlar bilan taminlangan o`quv xonalari, ularning yashash sharoiti qo`shni davlat vakillarida katta qiziqish uyg`otdi.
– Foydalanishga topshirilganiga hali ko`p bo`lmagan, zamonaviy qiyofa kasb etgan O`zbekiston oliy havbiy aviasiya bilim yurti tojikistonlik hamkasblarimizda katta taassurot qoldirdi, – deydi bilim yurti boshlig`ining birinchi o`rinbosari polkovnik Jamol Ro`ziev. – Ayniqsa, kursantlarning parvozlar oldidan ko`rayotgan qizg`in tayyorgarliklari ularning taassurotini yanada boyitdi.
Kursantlarning parvozoldi mashqlari o`tkaziladigan zamonaviy trenajyor mehmonlarda ulkan taassurot qoldirish bilan birga, bo`lajak o`zbek uchuvchilarining mashg`ulotlardagi faolligi, bilim va ko`nikmasi tojikistonlik harbiy delegasiya a`zolarini lol qoldirdi, desak mubolag`a bo`lmaydi.
Mehmonlar bilim yurti faoliyati bilan tashishar ekan, o`zlarining iliq fikrlarini bildirishdi hamda bu erdagi zamonaviy sharoitlar, xalqaro hamkorlik bo`yicha olib borilayotgan ishlar, umuman kursantlarning o`quv jarayonlarini yuqori baholashdi.
Mudofaa vazirligi Axborot va ommaviy kommunikasiyalar departamenti
