Harbiy xizmatga yuborish uchun ta`magirlik qilgan shifokor ushlandi, deya ma`lum qildi Bosh prokuratura Matbuot xizmati.
Bosh prokuratura huzuridagi Departamentning Samarqand viloyat boshqarmasi tomonidan IIB xodimlari bilan hamkorlikda tezkor tadbir o`tkazildi. Unda aniqlanishicha, Kattaqo`rg`on shahar tibbiy chaqiruv komissiyasi katta vrachi T.I. fuqaro X.Sh.ga uning o`g`li A.T.ni oyog`i yassi ekanligi va tibbiy ko`rikda “muddatli harbiy xizmatga yaroqsiz” deb topilganligini aytadi. Lekin shifokor tanishlari orqali muddatli harbiy xizmatga yuborish masalasini hal qilib berishni va`da qiladi. Buning evaziga esa 600 AQSh dollarini olgan vaqtida ashyoviy dalil bilan ushlangan.
Mazkur holat yuzasidan T.I.ga nisbatan Jinoyat kodeksining tegishli moddasi bilan jinoyat ishi qo`zg`atilib, tergov harakatlari o`tkazilmoqda.
