OAVda Toshkent maktablaridagi o`qituvchilardan oilaviy sharoitiga ko`ra o`z hisobidan ikki hafta ta`til olish uchun ariza yozishi talab etilgani to`g`risida maqola e`lon qilindi. Maqolada aytilishicha, bunday arizalarni olish to`g`risida 16 mart kuni buyruq olingan. Bu haqda Xalq ta`limi vazirligi xabar bergan.
2020 yilning 15 mart kuni Xalq ta`limi vazirligi soha xodimlarining amaldagi qonunchilikka muvofiq navbatdan tashqari ta`tilga chiqishi to`g`risida rasmiy bayonot berdi. Bayonotda xodimlar O`zbekiston Respublikasi mehnat qonunchiligiga muvofiq mehnat ta`tilining bir qismini olishi mumkinligi ta`kidlandi.
Mehnat to`g`risidagi qonun hujjatlarida haq to`lanadigan ta`til berishga oid talablar belgilangan (O`zbekiston Respublikasi Mehnat kodeksining 143-moddasi). Agar ushbu talablar bajarilmasa, xodimlarga qonunchilikka muvofiq ish haqi to`lanmaydigan ta`tilga chiqish taklif qilindi.
Shuningdek, 2020 yil 17 martda bo`lib o`tgan brifingda Xalq ta`limi vaziri Sherzod Shermatov hukumat komissiyasining qaroriga binoan 18 martdan boshlab, barcha o`qituvchilarga mehnat ta`tili berilishini e`lon qildi.
2020 yil 17 martda Xalq ta`limi vazirining tegishli buyrug`i qabul qilindi. Buyruqda qayd etilishicha, istisno tariqasida xodimlarga yillik ta`tilning qisqarishi munosabati bilan navbatdan tashqari ta`til beriladi.
Ish haqi saqlanmagan holda ta`til berilishi haqida yozgan xodimlar
hujjatlarni qayta rasmiylashtirish uchun maktab ma`muriyatiga murojaat qilishlari mumkin.
Shu bilan birga, xalq ta`limi hududiy bo`linmalarining rahbarlariga haq to`lanadigan ta`tilni ro`yxatdan o`tkazish talablariga rioya etishni ta`minlash vazifasi topshirildi.
