O‘zLiDeP deputati Oliy ta’lim, fan va innovatsiyalar vaziri hamda Bosh prokurorga "Deputat so‘rovi" yubordi.
Deputatlik so‘roviga ko‘ra, kuni kecha Respublika oliy ta’lim Kengashining nodavlat oliy ta’lim tashkilotlari tomonidan Oliy ta’lim muassasalarini rivojlantirish jamg‘armasiga to‘lov-kontrakt shaklida o‘qitishdan tushadigan mablag‘larning 4 foizini o‘tkazish bo‘yicha chiqarilgan bayonnomasi ijtimoiy tarmoqlarda keng muhokamalarga sabab bo‘lmoqda.
Shuni alohida ta’kidlash lozimki, tadbirkorlik faoliyati erkinligi qonunlarimizga muvofiq kafolatlangan, hech bir tashkilot qonunga asoslanmay turib, tadbirkorlik subyektlariga, shu jumladan, nodavlat oliy ta’lim muassasalariga turli to‘lovlar joriy qilish vakolatiga ega emas.
Shuningdek, mazkur holat sohaga xorijiy investitsiyalarni keng jalb etish, oliy ta’lim tizimini Markaziy Osiyoda xalqaro ta’lim dasturlarini amalga oshiruvchi “xab”ga aylantirish kabi islohotlarga salbiy ta’sir qilishi mumkin.
Shu sababli, deputat D.Artikov Oliy ta’lim, fan va innovatsiyalar vaziri va Bosh prokurordan respublika oliy ta’lim Kengashining nodavlat oliy ta’lim tashkilotlari tomonidan Oliy ta’lim muassasalarini rivojlantirish jamg‘armasiga to‘lov-kontrakt shaklida o‘qitishdan tushadigan mablag‘larning 4 foizini o‘tkazish bo‘yicha chiqarilgan bayonnomaning qonunchilik hujjatlariga muvofiqligi yuzasidan qayta ko‘rib chiqish bo‘yicha asoslantirilgan tushuntirish berish hamda o‘z nuqtayi nazarini bayon etishini so‘ragan.
