Xalqimiz keng nishonlaydigan Navro`z bayramida mehr-muruvvat, ahillik va hamjihatlik fazilatlari asosida nuroniy keksalarni har tomonlama e`zozlash, ko`makka muhtoj insonlarga beg`araz yordam berish bilan bog`liq xayriya tadbirlarini amalga oshirish ezgu an`nalarimizdan. Ana shu an`anadan kelib chiqqan holda Majburiy ijro byurosi Namangan viloyat boshqarmasi tomonidan bayram arafasida yakka yolg`iz, boquvchisini yo`qotgan, ijtimoiy himoyaga muhtoj oilalar xolidan xabar olinib, bunday oilalarga alohida mehr-muruvvat ko`rsatildi. Bu haqda Majburiy ijro byurosi matbuot xizmati xabar berdi.
M.Akramova Namangan shahrining “Dashtbog`” mahallasida istiqomat qiladi. Ehtiyojmand oilaning Byuro xodimlari tomonidan yo`qlovi, oziq-ovqat mahsulotlari tuhfa etilishi ularni behad xursand qildi. Shu kuni shuningdek, mahallada istiqomat qiluvchi yana 3 ta oilaga ham bayram sovg`alari topshirildi. Namangan shahrining “Go`zal” mahallasida istiqomat qiluvchi Akbarovlar xonadonidagilarning ham bayram arafasida quvonchiga quvonch ulashildi. Oilada uch farzand uchun kompyuter, o`quv qurollari hamda 15 turdagi oziq-ovqat mahsulotlari tuhfa etildi.
Byuroning shahar va tumanlar bo`limlari tomonidan bunday xayrli tadbirlar davom etmoqda.
