Rossiyaning Moskva shahridagi qariyalar yashaydigan xususiy pansionatlaridan birida tunda yong`in chiqqan. Pansionat yonida joylashgan ishchilar yotoqxonasida yashaydigan o`zbekistonlik, tojikistonlik mehnat muhojirlar yong`inda qolgan qariyalarni qo`llarida ko`tarib tashqariga olib chiqib, hayotlarini saqlab qolgan.
Lavhada samarqandlik Nurbek (Nurik), Aziz ismli yurtdoshlarimizdan qisqacha intervyular ham olingan. Ular o`z so`zlarida har qanday odam qilishi kerak bo`lgan ishni qilganini oddiygina qilib izohlagan.
Blogerning qayd etishicha, bu yigitlarga keyinchalik medal ham bermoqchi bo`lishgan. Biroq, ular “bizga medal emas, ish bo`lsa bas”, degan javobni bergan.
O`z A muxbiri hamyurtlarimizning bu jasoratlari haqida videolavha tayyorlab, o`zining YouTube kanalida e`lon qilgan rossiyalik mashhur bloger Islam Guseynov bilan suhbatlashdi .
– Islam, bu videolavhani tayyorlashga sizni nima majbur qildi?
– Insoniylik burchim tufayli bu videolavha tayyorlandi. Ushbu voqeadan xabar topganimdan so`ng asl qahramonlarni ko`rsatishni maqsad qildim.
— Bu voqea haqida qanday xabar topdingiz?
— Ijtimoiy tarmoqlardagi kanallarimda turli mamlakatlar fuqarolari, turli millat vakillari bor. Ular o`zlari guvoh bo`lgan qiziqarli voqealar yoki muammolari haqida xabarlar yuborib turishadi. To`g`risini aytsam, kelayotgan xabarlar, videolar juda ko`p. Hammasiga e`tibor qaratish jismonan mumkin emas. Ammo shunday voqealar bo`ladiki, uni bitta nigoh bilan darrov ilg`aysan, u haqda gapirmaslik ilojsiz bo`ladi.
— Videoda qahramonlar shaxsiga nega aniqlik kiritmagansiz?
— To`g`risi, ularning o`zi buni istamagan. Ko`plab mehnat muhojirlari o`zi haqida to`liq ma`lumot berishga ko`p hollarda juda cho`chiydi. Shundoq ham qiyin vaziyatini battar qilmaslik uchun ham. Axir oldindan bilib bo`lmaydi, kim qanday munosabatda bo`lishini.
— Bu video uchun sizdan butun xalqimiz juda minnatdor bo`ldi. Bundan oldin ham O`zbekiston bilan bog`liq chiqishlar qilganmisiz?
— O`zbekiston – men uchun sevimli o`lka. Bilaman, bu yurtda mehr-oqibatli odamlar yashaydi. Rossiyada yurgan o`zbeklarni kuzatib shu fikrga kelganman. Ba`zan mehnat muhojirlari haqida turli salbiy fikrlar ham bildiriladi. Ammo ular orasida har qanday sharoitda ham inson bo`lib qolayotgan chinakam insonlar juda ko`p. Asl insoniylikka duch kelganda esa buni olib chiqishga doim harakat qilganman. Men ularning mamlakatiga, millatiga qarab ajratmayman.
