Bir muddat avval xorazmlik 34 yoshli fuqaro T.K. o`z uyidan 27 mart kuni "Tiko" avtomashinasida chiqib ketib, qaytib kelmagani ma`lum qilinib, fuqaro bedarak yo`qolgani haqida takror xabar berib borilayotgan edi.
Ayni paytda fuqaroning jasadi kanaldan chiqqani ma`lum bo`ldi. Bu haqda Bosh prokuratura Matbuot xizmati xabar bermoqda.
Keltirilishicha, joriy yilning 17 aprel kuni Xazorasp tuman prokuraturasi tomonidan fuqaro T.K. bedarak yo`qolganligi holati yuzasidan JKning 97-moddasi 1-qismi bilan jinoyat ishi qo`zg`atilgan.
Olib borilgan tergov harakatlari davomida “Chap qirg`oq” suv taqsimlash inoshooti (kanali) dan “Tiko” rusumli avtomashina va avtomashina haydovchi o`rindig`ida T.K. bo`ynidan zanjir bilan avtomashinaning rul qismiga qulflangan holdagi murda topilgan.
Hozirda T.K. ning o`lim sabablarini aniqlash bo`yicha sud-tibbiy ekspertizasi tayinlangan. Tergov harakatlari olib borilmoqda, deyiladi rasmiy bayonotda.
