"Jarqo`rg`on tumani hokimi yo IIB boshlig`i hech bo`lmasa, qo`llaridagi bloknotni ochib, Prezidentning chaqiriqlarini o`qib ko`rmabdilarda!?" Deputat sud xodimlarining tahqirlanganiga munosabat bildirdi

Jamiyat 13.07.2020, 08:29
"Jarqo`rg`on tumani hokimi yo IIB boshlig`i hech bo`lmasa, qo`llaridagi bloknotni ochib, Prezidentning chaqiriqlarini o`qib ko`rmabdilarda!?" Deputat sud xodimlarining tahqirlanganiga munosabat bildirdi

Sal avval Surxondaryoda sud raisi a sud xodimlariga nisbatan IIB xodimlari tomonidan qilingan tahqirlash va ularni obro`sizlantirib do`pposlangani haqida xabar qilingan edi. Kuni kecha ushbu holat ijtimoiy tarmoq foydalanuvchilari va qator faollarni g`azablantirdi, ko`plab muhokamalar hamon davom etmoqda.

Xususan, Oliy Majlis Qonunchlik palatasi deputati Umid Jabborov vaziyatga mugnosabat bildirdi:

 “Jarqo`rg`onda sudyalar omma oldida obro`sizlantirildi, sud xodimi esa do`pposlandi” sarlavhali materialni o`qib, to`g`risi, taajjubda qoldim. Voqeaning qisqa tafsiloti shunday: tuman hokimi, tuman IIB boshlig`i kuppa-kunduzi, odamlar ko`z o`ngida sudyalarni “bir tiyin” qilgani etmay, sud xodimiga nisbatan haqorat va kuch ishlatib, shaxsiy telefonini zo`rlik ishlatib olib qo`yib, vaqtincha ushlab turish hibsxonasiga qamab qo`ygan.  

Avvaliga, qat`iy karantin tartiblaridan kelib chiqib, “Bu erda boshqa gap bo`lsa-chi? Balki, vaziyat shunchalik og`irlashishiga sud xodimlari o`zlariyam sababchidir?” degan savollar ham tug`ildi. Ammo, biroq, lekin... Ming o`ylansa ham, o`lchansa ham, bitta echim-javob chiqadi – QONUN! Ayniqsa, davlat hokimiyati organi rahbari va mansabdorlar qonunlarga itoat etishda, avvalo, o`zlari namuna ko`rsatishi kerak! Bu vaziyatda tuman hokiminiyam, ichki ishlar mansabdorlariniyam oqlab bo`lmaydi. “Est qilamiz! Kallami yo salla?” deguvchi mansabdorlardan natija kutish ahmoqlik emas, hatto tentaklik. Qonunga itoatkorlikni qonunni buzish hisobiga amalga oshirish mumkin emas.

Sudya odil sudlovni amalga oshirish vakolati berilgan shaxsdir. Qonunchilikka muvofiq O`zbekiston Respublikasida barcha sudyalar bir xil maqomga ega. Bu degani, Oliy Sudmi, viloyat, shahar, tuman (tumanlararo) sudlar raislari va sudyalarimi bir xil darajadagi daxlsizlikka ega.

Bugun biz O`zbekistonning xalqaro reytinglardagi yuqori o`rni uchun barcha sohada harakat qilyapmiz. Demak, yurish-turishimizdan tortib, to xizmat yoki mansab burchini sidqidildan bajarishimizgacha harakatlarimiz zamirida mamlakat obro`si turganini o`ylashimiz kerak. Xalqaro reytinglarning eng muhim ko`rsatkichlaridan biri sudlar mustaqilligi va odil sudlov uchun sudyalar daxlsizligini kafolatlash ekanini aynan Jarqo`rg`on tumani hokimi yo IIB boshlig`i bilmaydilarmi? Hech bo`lmasa, qo`llaridagi bloknotni ochib, Prezidentning odil sudlov va sud mustaqilligi bo`yicha yaqindagina aytgan chaqiriqlari, da`vatlarini o`qib ko`rmabdilar-da?

O`zbekiston Respublikasi “Sudlar to`g`risida”gi Qonunning 70-moddasida sudyalar daxlsizligi aniq belgilab qo`yilgan: “Sudyaning shaxsi daxlsiz. Sudyaning daxlsizligi uning turar joyiga, xizmat xonasiga, foydalanadigan transporti va aloqa vositalariga, xat-xabarlariga, unga tegishli ashyolar va hujjatlarga taalluqlidir.

Sudyaga nisbatan jinoyat ishi faqat O`zbekiston Respublikasi Bosh prokurori tomonidan qo`zg`atilishi mumkin”.

Shuningdek, sudyaning xizmat xonasi yoki foydalanadigan transportiga kirish, ularni ko`zdan kechirish, ulardan ashyoni olish, sudyani shaxsan ko`zdan kechirish va uni shaxsiy tintuv qilish, unga tegishli ashyolarni olib qo`yish yoki olishga faqat tegishli prokuratura ruxsati yoki sudning qarori bilangina yo`l qo`yiladi.

Jarqo`rg`ondagi kabi “sallachi” mansabdorlar karomatidan voz kechmas ekanmiz, xalqaro reytinglardan-da muhimroq narsalarga ham erishishimiz qiyin. Davlat organlari va mansabdor shaxslar, fuqarolar sudyalarni hurmat qilishi va ularning mustaqilligiga rioya etishlari shart. Sudyaga nisbatan hurmatsizlik qilish, uni ochiqdan-ochiq mensimaslik kabi xatti-harakatlari uchun kim bo`lishidan qat`i nazar qonunga ko`ra javobgarlikka tortilishi kerak!"

Eslatib o`tamiz, ushbu holatga Bosh prokuratura va Ichki ishlar vazirligi munosabat bildirib, hozirgi vaqtda yuzaga kelgan holat prokuratura organlari tomonidan o`rganilib, ishtirokchilarning harakatlariga huquqiy baho berilishi haqida ma`lum qilgan.

 

 

Sharhlar

Ob-havo: Toshkent
Valyuta kursi
1