Ma`lumki, chet tillaridan sertifikatga ega abiturientlar ro`yxatdan o`tishda sertifikat ma`lumotlarini tizimga kiritadi.
Hozirda mazkur ma`lumotlar asosida Davlat test markazi tomonidan sertifikatlarning haqiqiyligi tekshirilmoqda va ularga 3 xil status berilmoqda:
1.Sertifikat dasturga kiritilganda – “Tekshirilmoqda”.
2.Sertifikatning haqiqiyligi va imtiyoz berish uchun talabga javob berishi aniqlanganda – “Tasdiqlandi”.
3.Sertifikatning haqiqiyligi tasdiqlanmasa yoki imtiyoz berish uchun talabga javob bermasa – “Tasdiqlanmadi”.
Bunda, sertifikati tasdiqlanmagan abiturientlarda, sertifikat nima uchun tasdiqlanmaganligining sababi ham keltiriladi.
Hozirgi kunga qadar Davlat test markazi tomonidan 6 000 dan ziyod sertifikatlar tekshirildi va 450 dan ortiq sertifikatlar talabga javob bermasligi aniqlandi.
Sertifikatlarni tekshirish ma`lum vaqt olishini inobatga olgan holda, DTM chet tili sertifikatiga ega abiturientlardan sertifikatlarini 18-iyulga qadar kiritishlarini so`ramoqda.
