Britaniyalik olimlarning olib borgan yangi tadqiqotlariga ko`ra, koronavirusdan tuzalgan bemorlarda bu kasallikka qarshi immunitet faqatgina bir necha oy davom etadi xolos. Bu haqda tarjumon.uz xabar berdi.
Bunga sabab shuki, organizmda koronavirusni engishda immunitetga ta`sir qiluvchi antitanalarning miqdori ma`lum muddat o`tgach kamayib ketadi.
Tadqiqotlardan ma`lum bo`lishicha, odamlar COVID-19 ga shamollash kabi har yili chalinishlari mumkin. Ushbu natijalar Londonning “Qirollik kolleji” olimlari tomonidan 90 ta bemorning immmunitetini tekshirib ko`rilganidan keyin ma`lum bo`ldi.
Unga ko`ra, koronavirusdan tuzalgan bemorlarning 60 foizida bu infeksiyaga qarshi kuchli immunitet hosil bo`lgan. Ammo, uch oydan so`ng ushbu bemorlarning 17 foizidagina immunitet saqlanib qolgan.
Shu muddat mobaynida ularning qonidagi antitanalar miqdori 23 martagacha kamaygan, ba`zi bemorlarda esa antitanalar umuman aniqlanmagan.
“Odam organizmi koronavirusga qarshi etarli miqdorda antitana ishlab chiqarmoqda. Lekin, ular qisqa muddatdan keyin kamaymoqda. Antitanalarning qancha muddat saqlanib qolishi odam organizmining qanchalik kuchliligiga bog`liq. Agar organizmda paydo bo`layotgan virusga qarshi antitanalar faqat 2 yo 3 oy davom etsa, vaksina ham xuddi shuncha muddat ichidagina virusga qarshi kurashadi xolos. Bu esa COVID-19 dan himoyalanish uchun bir marta vaksina qabul qilishning o`zi etarli bo`lmasligini anglatadi” deydi ushbu tadqiqotlarni olib borgan olimlardan biri Keyti Durers.
Kembrij universiteti virusologi professor Jonatan Hiniyning so`zlariga ko`ra, ”Qirollik kolleji” tomonidan olib borilgan tadqiqotlar COVID-19 ga qarshi immunitetning umri juda qisqa ekanligini isbotladi.
“Eng muhimi shuki, bu tadqiqot insoniyatning koronavirusga qarshi umumiy immunitet hosil qilishi tushunchasini barbod qilayotgan yana bir dalil bo`ldi” deydi Hiniy.
