Британиялик олимларнинг олиб борган янги тадқиқотларига кўра, коронавирусдан тузалган беморларда бу касалликка қарши иммунитет фақатгина бир неча ой давом этади холос. Бу ҳақда таржумон.уз хабар берди.
Бунга сабаб шуки, организмда коронавирусни енгишда иммунитетга таъсир қилувчи антитаналарнинг миқдори маълум муддат ўтгач камайиб кетади.
Тадқиқотлардан маълум бўлишича, одамлар CОVID-19 га шамоллаш каби ҳар йили чалинишлари мумкин. Ушбу натижалар Лондоннинг “Қироллик коллежи” олимлари томонидан 90 та беморнинг имммунитетини текшириб кўрилганидан кейин маълум бўлди.
Унга кўра, коронавирусдан тузалган беморларнинг 60 фоизида бу инфекцияга қарши кучли иммунитет ҳосил бўлган. Аммо, уч ойдан сўнг ушбу беморларнинг 17 фоизидагина иммунитет сақланиб қолган.
Шу муддат мобайнида уларнинг қонидаги антитаналар миқдори 23 мартагача камайган, баъзи беморларда эса антитаналар умуман аниқланмаган.
“Одам организми коронавирусга қарши етарли миқдорда антитана ишлаб чиқармоқда. Лекин, улар қисқа муддатдан кейин камаймоқда. Антитаналарнинг қанча муддат сақланиб қолиши одам организмининг қанчалик кучлилигига боғлиқ. Агар организмда пайдо бўлаётган вирусга қарши антитаналар фақат 2 ё 3 ой давом этса, вакцина ҳам худди шунча муддат ичидагина вирусга қарши курашади холос. Бу эса CОVID-19 дан ҳимояланиш учун бир марта вакцина қабул қилишнинг ўзи етарли бўлмаслигини англатади” дейди ушбу тадқиқотларни олиб борган олимлардан бири Кейти Дурерс.
Кембриж университети вирусологи профессор Жонатан Ҳинийнинг сўзларига кўра, ”Қироллик коллежи” томонидан олиб борилган тадқиқотлар CОVID-19 га қарши иммунитетнинг умри жуда қисқа эканлигини исботлади.
“Энг муҳими шуки, бу тадқиқот инсониятнинг коронавирусга қарши умумий иммунитет ҳосил қилиши тушунчасини барбод қилаётган яна бир далил бўлди” дейди Ҳиний.
