Bugun Toshkent shahar hokimi J. Ortiqxo`jaev Toshkent shahridagi Ibn Sino nomidagi shahar 1-sonli klinik shifoxonasida bo`lib, undagi sharoitlar bilan tanishdi hamda COVID-19 bilan xastalangan fuqarolarning oila a`zolari bilan suhbatlashdi.
Muloqot davomida kasalxonada davolanayotganlarning tezda shifo topishi uchun barcha sharoitlar, jumladan, dori-darmonlar va oziq-ovqatlar ta`minoti to`liq ekanligini aytib o`tdi. Fuqarolarning ko`rsatilayotgan tibbiy yordam qoniqarli emasligi to`g`risidagi xavotirli fikrlarini tinglab, ularning savollariga atroflicha javob berdi.
Mutasaddilarga fuqarolarning ehtiyoj va iltimoslarini o`rganib, ularni talab darajasida qondirish yuzasidan topshiriqlar berdi.
Keyingi manzil Toshkent shahar Tez tibbiy yordam xizmati dispetcherlik markazi bo`lib, hokim kelib tushayotgan murojaatlarning qabul qilinish jarayonini ko`zdan kechirdi. Mavjud muammolarga joyida echim taklif qilib topshiriqlar berdi.
Markaz xodimlariga fuqarolardan murojaatlarni tez qabul qilish, tibbiy yordam guruhlarini murojaat manzillariga o`z vaqtida jo`natish va aholi bilan samimiy muloqotda bo`lish yuzasidan tavsiyalar berdi.
