“Ажал жодуси” фильми бугунги кунда жуда кўп муҳокамаларга сабаб бўлган фильм бўлди. Ҳар бир актёрнинг ўз ўрнида танланганлиги, реал воқеаларга асосланганлиги, ғоявий жиҳатдан бутунлиги фильмнинг муваффақиятини таъминлади. Барча фильмлари муваффақиятли қабул қилинаётган режиссёр Ҳилол Насимовни суҳбатга тортдик.
- Кичик ўғлингиз Фотиҳ Насимов “Ажал жодуси” фильмида актёрлик маҳоратини жуда яхши намоён қила олди. Уни фильмларингиздаги иштироки бошқа режиссёрлар томонидан роль берилмаслигига олиб келишидан қўрқмайсизми? Назаримизда, бошқа режиссёрлар унинг маҳоратини пайқамай қолаётгандек…
- Бошқа режиссёрлардан ҳам таклиф тушяпти. Мисол учун, “Шунқорлар” фильмида роль ижро қилди. Аюб Шаҳобиддиновнинг фильмида Муҳаммад Юсуфнинг болалигини гавдалантирди. Ҳозир ўқиш жараёни, институтга кирди шу сабабли ундан кўпроқ ўқиш ва билим олишини талаб қиляпман. "Ажал жодуси"да ака образини яратган катта ўғлимнинг ҳам ижро маҳоратини жуда яхши баҳолашди. У ҳам ўз зиммасига юкланган вазифани адо қилди, назаримда. Фильмда кичик ўғлимга каттароқ вазифа топширилган эди. Ўша поезд танбурида отасининг жасадини ўғирлаб кетганларидаги ҳолатни ўзим ҳам ҳозиргача унута олмаяпман.
- Фильмга тайёргалик жараёнига қанча вақт кетди?
- Тайёргарлик жараёнига 1 йилдан ортиқ вақт кетди. Фильм МХХ тўплаган ҳужжатларга асосан ишланган. Ҳаттоки ушбу ҳолатлар бўйича ҳаётий прототипларини ўз кўзим билан кўриб, ўрганиш учун Наманганнинг Поп шаҳрида, Чирчиқда сақланаётган махбуслар колониясида бўлдим. Улар билан шахсан суҳбатлашиб сценарийнинг ҳаётлилигини таъминлашга урундим.
- Тасвирга олиш ишлари қанча давом этди?
- Икки ойдан ортиқ вақт кетди.
- Фильм бюджети, актёрларга тўланадиган гонарарларингизни ошкор қила оласизми?
- Йўқ. Фильм давлат буюртмаси асосида ишланганлиги учун бирорта актёр менга мана шунча пул берасиз дегани йўқ. Энг катта ролдан энг кичигигача барча ролларни актёрларимиз бажонидил ижро қилишди. Бу актёрларимизнинг ватанпарварлик туйғуси борлигидан, ватанимиз учун керак бўлган филмларда иштирок этишга ҳайрихоҳлигидан далолат. Фильм бюджети “Ўзбеккино” миллий агентлиги томонидан белгиланган сметадан иборат бўлди. Бошқа бирорта ҳомий жалб қилингани йўқ.
- Нима сабабдан фильм катта экранларда ҳеч қанча муддат намойиш этилмасдан телевидение орқали намойиш этилди?
- Фильм премьераси куниёқ кинотеатрларнинг барча заллари тўлди. Ундан кейинги кунларда ҳам одамлар бир-биридан эшитиб келганликларига ҳам гувоҳ бўлдик. Биз аввал одамлар енгил-елпи киноларга киришади дердик, йўқ одамлар реал воқеаларга асосланган, келажак ҳақида ўйлантирадиган фильмларга киришаётганини гувоҳи бўлдик. Телеканаллар орқали фильмни намойиш қилишимизга сабаб эса мутасадди идораларимиз томонидан ҳозирги вазият мураккаб замонда уни чекка ҳудудлардаги кинотаетрларга бориш имконияти бўлмаган юртдошларимиз ҳам кўриши зарур деб топилгани бўлди. Бу қарор қанчалик тўғри бўлганлигини одамлар орасидаги муҳокамалардан билиш мумкин.
