Блогер Хушнудбек Худойбердиев «Менинг фикрим» жамоавий мурожаатлар портали ҳақида аввал бир неча бор танқидий фикр билдирган эди. Айни пайтда у IMEI кодларни рўйхатга олишда тўлов ундиришни бекор қилиш бўйича петиция мисолида яна бир бор ўзини оқламаётган бу тизим ҳақида сўз юритди:
"Шахсан мен бу портални кўзбўямачилик учун очилган деб ҳисоблайман. Буни пропискага оид петицияларимда тўла ишонч ҳосил қилгандим.
Майли, бу менинг шахсий фикрим. Аммо яхшими, ёмонми порталнинг ўзи қонун ҳужжатларига амал қилган ҳолда фаолият юритиши керакку, тўғрими?
Масалан, жорий йилнинг 17 февраль куни, яъни бундан салкам 8 ой муқаддам IMEI кодларни рўйхатга олишда тўлов ундиришни бекор қилиш бўйича петиция 3 соат ичида 10 мингдан ортиқ овоз йиғган эди. Бугунги кунда овозлар сони 25 мингга яқинлашган.
Яъни ўшанда халқ ўз фикрини қонуний йўл билан маълум қилганди. Кўчага чиқиб жанжал қилмади, кимларнидир ҳақорат қилмади, бузғунчиликка қўл урмади. Шунчаки амалдаги қонунлар орқали демократик йўл билан ўз хоҳиш-иродасини билдирди.
Аммо орадан шунча пайт ўтган бўлса-да, бу бўйича ҳеч қандай қарор қабул қилинмади. На ижобий, на салбий.
Ваҳоланки, «Менинг фикрим» порталининг фаолияти Олий Мажлис Қонунчилик палатаси Кенгашининг ва Олий Мажлис Сенати Кенгашининг 2019 йил 2 февралда қабул қилинган 2310-III/КҚ-503–III-сонли Қўшма қарорига асосан ташкил этилган. Ушбу қарор билан тасдиқланган Низомнинг 35-бандида шундай дейилади:
«Зарур миқдорда қўллаб-қувватловчи овоз тўплаган мурожаатни кўриб чиқиш ва у бўйича қарор қабул қилиш муддати мурожаат ваколатли давлат органига келиб тушган пайтдан эътиборан олтмиш кундан (❗️) ошмаслиги керак».
Парламент қўшма палаталарининг қарори эса қонунга тенглаштирилган. Демак, қонунлар бузиляпти. Орадан 233 кун ўтган бўлса ҳам қарор қабул қилинмади.
Бу бўйича сенаторлар ҳам, депутатлар ҳам сукут сақламоқда. Ўрага сичқон тушди, гулдур гуп. Бу масала бўйича жамоатчилик назорати ишлади, аммо парламент назорати шу жойда оқсамоқда.
Қани, яна кутайликчи, балки энди эсларига тушиб, жараённи тезлаштириб юборишар. Тепадан кимдир топшириқ ёки баёнот берса-ку,зўр бўларди-я, дарров ҳамма ҳаракатга тушиб кетарди, эсидан чиққан нарсалар ёдига тушарди, халқ манфаати ҳақида жўшқин маърузалар ёзиларди бир пасда. Лекин қачонгача топшириқ кутамиз, шуниси қизиқ",
- мулоҳақда қилади блогер.
Шунингдек, "...ҳар эҳтимолга қарши бир нарсани эслатиб ўтай, петицияда тўловларни арзон қилиш таклиф этилмаяпти, бекор қилиш ҳақида гап кетяпти. Тағин эртага тўловни озгина арзон қилиб, «мана, биз петицияни бажардик» деб ёш болани алдагандай муносабат бўлмайди, деган умиддаман", - қўшимча қилган у.
