Тошкентда Президент маслаҳатчисининг биринчи ўринбосари раҳбарлигидаги ишчи гуруҳнинг сайёр қабуллари давом этяпти

Хабарингиз бор, фуқароларни қийнаб келаётган муаммоларини аниқлаб, жойида ижобий ҳал этиш, ҳуқуқий жиҳатдан кўмакка муҳтож бўлганларга керакли ҳуқуқий ёрдам кўрсатиш мақсадида жорий йил бошидан Тошкент шаҳрида қатор сайёр қабуллар ташкил этилди. Фуқароларнинг мурожаатларини инобатга олган ҳолда сайёр қабулларни ўтказиш давом этяпти.

Хусусан, 15 июндан бошлаб Ўзбекистон Республикаси Президенти Администрацияси ташаббуси билан Президент Халқ қабулхоналари, Олий суд, Тошкент шаҳар судлари ва қатор ташкилотлар раҳбар ходимлари иштирокида галдаги оммавий қабуллар бошланди.

Ўзбекистон Республикаси Президенти маслаҳатчисининг биринчи ўринбосари Бахтиёр Исломов раҳбарлигидаги Ишчи гуруҳ томонидан Сирғали ва Янгиҳаёт туманларида суд-ҳуқуқ масалалари бўйича оммавий қабуллар ўтказилди. Бу ҳақда Тошкент шаҳар судининг Жамоатчилик ва ОАВ билан ҳамкорлик бўйича бош консультанти Садоқат Аллаберганова хабар қилди.

Суд-ҳуқуқ масалалари бўйича фуқароларни Олий суд раиси ўринбосари Бахтиёр Исаков, Тошкент шаҳар суди раиси Эркин Ходжакулов, Тошкент шаҳар маъмурий суди раиси Улуғбек Алмамедов, Тошкент шаҳар суди раиси ўринбосари–фуқаролик ишлари бўйича судлов ҳайъати раиси Шуҳрат Аббасов, Тошкент шаҳар суди раиси ўринбосари – жиноят ишлари бўйича судлов ҳайъати раиси Акбарали Турабов, Тошкент шаҳар суди раиси ўринбосари– иқтисодий ишлар бўйича судлов ҳайъати раиси Мақсудбек Саидов ва фуқаролик ва жиноят ишлари бўйича, маъмурий ва иқтисодий судларнинг раислари ва судьялари жами 58 нафар фуқаронинг мурожаатлари қабул қилишди. Уларнинг

16 таси жиноят;
38 таси фуқаролик;
2 таси маъмурий;
2 таси иқтисодий ишлар бўйича судларга оид мурожаатларни ташкил этди.

Мурожатлардан 17 та иш: хусусан,

фуқаролик ишлари бўйича уй-жой низоси, мерос гувоҳномасини олиш, кредит, ноқонуний қурилма, ажрим, ишга тиклаш, никоҳдан ажратиш, болани олиб бериш, ўзбошимчалик билан эгаллаб олинган ер майдонидаги қурилмани бузиш масалалари;
жиноят ишлари бўйича жиноят иши юзасидан енгиллик бериш, ҳарбий суднинг ҳукми ва апелляция ажримларидан норозилик, қўйилган айбловдан оқлаш, маъмурий ҳуқуқбузарлик иши бўйича қабул қилинган қарордан норозилик каби ҳолатлар юзасидаги ишлар назоратга олинди.