Ўзбекистон Бош вазири ўринбосари, Туризм ва маданий мерос вазири Азиз Абдуҳакимов ҳамда Россия Федерацияси Бош вазири ўринбосари Дмитрий Чернишенко икки давлат ўртасида сайёҳлар оқимини ошириш учун шароит яратиш бўйича чора-тадбирлар режасини имзолади.
Қўшма режа 20 та чора-тадбирни қамраб олган. Жумладан:
- Ўзбекистон ва Россия туризм йили ўтказилади.
- «Буюк ипак йўли» трансчегаравий сайёҳлик йўналиши йўлга қўйилади.
- Фестиваль, гастроном, экстремал, қишки каби туризм турлари бўйича махсус сайёҳлик пакетлари ишлаб чиқилади.
- Ўзбекистон ва Россия талабалари учун танишиш саёҳатлари ташкиллаштирилади.
Бундан ташқари, Ҳукуматлараро комиссия доирасида туризм соҳасида ҳамкорлик бўйича алоҳида Ўзбекистон-Россия қуйи комиссияси тузилади.
"Туризм алоқаларини мустаҳкамлашга қаратилган ҳамкорликдаги ишлар янги йўналишлар очиш, давлатларимиз фуқароларининг қулай дам олиши учун имконият яратади", - деди Россия Федерацияси Бош вазири ўринбосари Дмитрий Чернишенко.
