Тошкентда ёши катта эркак 13 яшар қизга тегажоғлик қилгани маълум бўлди. Бу бўйича жорий йилнинг 31 май куни "Nemolchi.uz"га мурожаат келиб тушган.
Қизнинг кўрсатмасига кўра, қария аввалига автобус силкинганида гўёки билмасдан қизга суянади, кейин эса қўлини икки оёғи орасига суқади. Қиз чўчиб тушади ва унинг қўлини ўзидан итаради. Эркак шунда ҳам ҳаракатларида давом этади. Қиз бир нима дейишга ҳам чўчиб, қўлини ўзидан итаради. У эса қулоғига "озгина сабр қил" деб пичирлайди.
Қизча қариянинг юзи ва тушиб қолган бекатини эслаб қолади, шу вақтнинг ўзида онасига қўнғироқ қилиб, воқеани сўзлаб беради.
Маълум бўлишича, эркакнинг юзи ўша атрофдаги кузатув камераларига мухрланиб қолган.
Юз берган ҳодисадан сўнг, аёл участка нозирига ариза ёзган.
Орадан бир муддат ўтиб, 3 июнь куни аёлга участка нозири телефон қилиб, қиз ва онасини Яккасарой тумани ИИБга таклиф қилган. Шундан сўнг эркак гумонланувчи сифатида олиб келинган. Айни вақтда суриштирув ишлари давом этаётгани айтилмоқда.
