Тошкент вилоятида 7 июнь куни 2 киши поезд уриб кетиши оқибатида воқеа жойида ҳалок бўлди. Бу ҳақда Транспорт прокуратураси хабар берди.
Аниқланишича, соат 06:30 да Термиз–Тошкент–Андижон йўналишидаги йўловчи поезди Жалойир–Кучлук темирйўл бекатлари оралиғида Ўрта Чирчиқ тумани тиббиёт бирлашмасида рўйхатда турувчи, 1-гуруҳ ногирони (қулоғида нуқсони бор) йигитни уриб юборган.
Фуқаро ўз эҳтиётсизлиги ҳамда олган тан жароҳатлари оқибатида воқеа жойида ҳалок бўлган.
Бундан ташқари, шу куни соат 09:50 да Бўзсув–Чирчиқ йўналиши бўйича ҳаракатланиб кетаётган электровоз Чирчиқдаги нонвойхонада ишчи бўлиб ишлаган, дўконларга нон олиб бориб бериш мақсадида велосипед ҳайдаб, қўл телефонидан фойдаланиб ўтиб кетаётган 20 ёшли йигитни уриб юборган.
Ушбу фуқаро ҳам ўз эҳтиётсизлиги ҳамда олган тан жароҳатлари оқибатида воқеа жойида ҳалок бўлган. Ҳозирги вақтда юқорида қайд қилинган ҳолатлар юзасидан Тошкент транспорт прокуратураси томонидан терговга қадар текширув ҳаракатлари олиб борилмоқда.
